Shillong, Nohprah 14: U Myntri Rangbah ka jylla u Conrad K Sangma u la ong ba kibun ki samla ha ka jylla kiba don kyrhai ki sap ki phong jong ki hynrei bunsien hi kim pei phang wat ha lade ba ki don ïa kata ka sap ka phong, ïa kane u la kren ha ka sngi Ba-ar haba kren ha ka Aspire Meghalaya State Summit 2022 ba la pyllong ha Shillong International Centre for Performing Arts & Culture (SICPAC).
U Myntri Rangbah u la ong ba ki samla kiba pei phang ïa ka jingdonsap jong ki hynrei bunsien kim ju ïoh ïa ki rynsan ban pyni ïa kata ka sap kaba ki don.
U la ong ruh ba ka donkam ïa ki samla ba kin ïoh ïa ka jingkdew lynti lem shaei ba kin jam ban nang pynjanai shuh shuh ïa ka sap ba ki ai.
U la ong ba ka jingpynmih ka sorkar ïa ka ka prokram kum ka Aspire ka long ban ïarap ïa ki samla ba kin ïoh ïa ka jingkdew lynti ban pynjanai ïa ka sap bad kin ïoh rynsan ban pyni ïa ka sap ba ki.
Shuh shuh u la ong ba ka dei ka kamram jong baroh ban ïarap ïa ki samla ban sei la ka sap ki phong namar ka jingkhlain ka jylla ka shong ha ki samla kiba tip la ka sap bad kiba nang ban pyntreikam ha ka jaka ba dei.
Ha kane ka submit la wan shim bynta da palat 1500 ngut ki samla pule na ki 62 tylli ki jaka pule kiba don ha kylleng ka jylla ban pyni ïa ka sap kaba ki don kum ka sap rwai sap shad, ka sap tem sap put, ka sap shna sap thaiñ bad ka don.
Kine ki samla kiba wan shim bynta ki long hadien ba ka la don ka jingwad ïa ka sap jong ki samla lyngba ka Soft Skills and Talent Identification programme hapoh ka Aspire Meghalaya.
Na pdeng kine samla kiba wan pyni ïa ka sap jong ki la jied ïa 10 ngut da ki nongbishar kum ki nongjop ba ha khlieh duh ne top 10 bad kiba la ïoh ha kane ka kyrdan ki long u First Colour Lathong, 19 snem ka rta uba pule ha ka klas ha St. Dominic Higher Secondary School, Mookyndeng, West Jaintia Hills District, ka Rida L Nonglait, 15 snem bad kaba pule klas 9 ha Kynshi Higher Secondary School, Kynshi, Eastern West Khasi Hills District bad i Phibalari Thongni,14 snem ba pule ha ka klas 9 ha St. Mary’s Higher Secondary School, Rangblang, South West Khasi Hills District, Fiuberth Ch Momin , ba 21 snem ba pule ha ka klas 11 ha Captain Williamson Memorial Government College, South Garo Hills District, Fastrossing Kharsyntiew, 21 snem bad Pynshaibor Wahlang, 19 snem bad pule ha ka klas 12 ha Sibsingh Memorial Government Higher Secondary School, West Khasi Hills District; Excellency Turnia, 20 snem, 1st Sem, Sngap Syiem College, South West Khasi Hills; Jiovanni Nongrum, 22 snem, 5th Sem, Nongstoin College, West Khasi Hills District; Gavy Jones Lyngdoh Marshillong 21 snem, 5th Sem, Nongstoin College, West Khasi Hills District; Wadamika Phalangki 18 snem, ha ka klas 12, ba pule ha Government Girls’ Higher Secondary School, Jowai, West Jaintia Hills District; Annyzza Gratel Lyngdoh 20 snem, 3rd Sem na Ri Bhoi College, Ri Bhoi District; bad i Anastacia Sun 17 snem ha ka klas ba 11 na Kynshi Higher Secondary School, Eastern West Khasi Hills District.
Ha kane ka sngi ka don ruh ka jingpyllait ïa ka Meghalaya Youth Survey 2022 Study da ka W A M Booth, Director, Sports & Youth Affairs Department bad kumjuh ïa ki jingrwai bad ka jingpynbyrngia na ki riew donsap kiba bun.
