Ki Samla Kum Ki Nongtei Ri

Ia kane ka Jingthoh la sot na ka Jingkren kaba nga lah ioh ban ai hapdeng ki Khun samla jong ka Dong ka thain War Jaintia ha ka Prokram ba lah pynlong da ka “WAR JAINTIA YOUTH SOCIAL ORGANISATION” ha ka 20 Tarik U Nailar, 2022 ha Don Bosco Hall, Shillong halor ka Theme” Ki Samla Kum Ki Nongtei Ri” ia kaba nga kwah ruh ba ki para samla jong ka Jaidbynriew hi baroh ki donkam ban tip bad sngewthuh ba kumno ngi don ia ka lyngkor bad ka jingkitkhlieh ban tei ia la ka Ri.
Kumba ka Theme ka Long “Ki Samla Kum Ki Nongtei Ri”, kumta ruh ha kane ka por ngan pyrshang ban pynshai bad ban kyntu khamtam eh ia ki khun samla jong ka dong ka thain War Jaintia bad jong ka Jaidbynriew hi baroh kawei, ba kumno ma nga lem bad ma ngi lang baroh ki Khun samla jong ka Bri U Hynniewtrep ba ngi dei ban leh na ka bynta ban tei ia la ka Ri bad ka Jaidbynriew. Ka Jylla Meghalaya jong ngi ka don kumba 74-75 per cent ki nongshong shnong kiba don hapoh ka 35 snem ka Rta. Ha kaba kumba 31% ki don hapdeng ka Rta kaba 15-29 snem. Kaba mut ki samla bad ki khynnah ki tam ar shah ia ki rangbah bad ki tymmen. Kane ka pyni ruh ba ka Jylla jong ngi ka dei ka Jylla kaba bun ki nong shong shnong kiba dang khie dang san. Kaba mut ruh ba “Ki Samla ki don ia ka bor ban tei ia ka Ri lane ban pynjot pynpra ia ka (Youths have the power to build or destroy a nation). Kumba ka tien ka ong “Ki samla ki dei ka lawei jong ka Ri bad ka Jaidbynriew” kumta ruh ka shong ha ngi ba ngin rai kaba kumno kata ka lawei ngi kwah na ka bynta ka Ri bad ka Jaidbynriew.
Halor katei ka Theme, nga kwah ban pashat jingmut ha ngi lang baroh ia kine ki Saw tylli ki mat kiba iadei bad ka kamram jong ki Samla ha ka imlang sahlang bad kumno ban tei ia la ka Ri.
Kaba Nyngkong kadei “KI SAMLA BAD KA PULE PUTHI”: Ka Nongrim ba skhem jong kano kano ka Ri bad Ka Jaidbynriew, ka Ioh ka kot bad kumjuh ruh ka Lawei jong kata ka jaidbynriew, ka shong eh ba kumno lane haduh katno ki samla jong kata ka jaidbynriew ne ka Ri bad ka Jylla ki kiew sha ka kyrdan ka jingnang jingstad lyngba ki kyrdan pule ki jong ki. Ka Jingnang jingstad ka ai ia ngi ia kata ka bor pyrkhat ban rai bad ban sngewthuh ia kaei kaba bha na ka ba sniew, ia kaba dei na ka ba lait. Ka ai ha ngi ia ka jingshem phang ban trei, ban kren bad ban leh ia kaba bha tam na ka bynta ka Ri bad ka jaidbynriew kumjuh ruh ia ka dong ka thain, ka shnong ka thaw ka jong ngi. Kumta, ngi dei ban sngewthuh ba ka Pule Puthi ne ka jingnang jingstad kadei ka jingdonkam ba kongsan eh ym kaei kaei kaba ngi lah ban jied (Education is a necessity, it is not an option”. Ngin tei ia la ka Ri lyngba ka pule puthi bad ka kyrdan pule ka jong ngi bad khnang ba ngim donkam ban wad ia u briew uba na bar ban wan trei wan ktah ne kamai kajih ha ka Ri Ka jong ngi.
Kaba Ar kadei “KI SAMLA BAD KI SOCIAL MEDIA”: Ka Jingdon jong ki Social Media kum ki You Tube Channels, ka FB, Watsaap bad kiwei kiwei ka long ruh ka jingkyrkhu namar ba bun na ki samla ki jong ngi khamtam ha ki Thain Nongkyndong ngim ju shlan ne shlur ban mih shakhmat ban kren lane pynpaw ia ki jingsngew ki jong ngi halor kano kano ka mat hynrei mynta baroh baroh ki ia nud ban comment bad thoh ban pynpaw ia ka jingsngew ka jong ki lyngba ki Social Media. Kumba ong ha ka ktien Nongwei “Voicing ones opinion is no longer a luxury of the rich and the elite”. Mynta baroh ngi lah ban kren bad pynpaw ia ka jingsngew ka jong ngi. Ki samla mynta ki kylli jing kylli, ki pynpaw ia ka jingpyrshah bad ki ia snohkti lang ha ryngkat kiwei pat ban kren bad leh ei ei halor ki mat kiba ktah ia ka Ri Ka jaidbynriew lane ia ka imlang sahlang. Ki Social Media ki lah long ki rynsan kiba donbor haduh katta katta bad ka shong ha ngi ki khun samla kumno ban pyndonkam ia ki ha ka lynti kaba dei. Lada ki samla ki mih shakhmat, ki pynpaw ia ka jingsngew ka jong ki bad pynsngew ia ka sur kaba jam ka jong ki, khlem pep ka Ri bad ka Jaidbynriew ka jong ngi ka don ha lynti jong ka jingkyrmen na ka bynta kaba bha tam ia ngi lang baroh bad dei hangta ba ka Jingkylla kan sa wan bad ngin sa lah ban tei ia ka Ri ha ka nongrim kaba skhem.
Kaba Lai kadei “KI SAMLA BAD KA JING SHAKRI NE IARAP IA KI PARA BRIEW” (YOUTHS & VOLUNTEERISM): Ha kaba iadei bad kane ka bynta, nga shu kwah ban pynkynmaw ia ngi Ki Samla baroh ia kine harum ki saw tylli ki jingkren jong ki stad pyrkhat bad ki Riewkhraw kiba lah pynpaw ba balei ngi donkam ban don ia ka mynsiem jingiarap bad noh synniang ia u Parabriew khamtam eh ban sdang na ki Shnong ki thaw, ka dong ka thain bad na la ki para ri paradoh parasnam:
“Wherever you turn, you can find someone who needs you. Even if it is a little thing, do something for which there is no pay but the privilege of doing it. Remember, you don’t live in the world all of your own- Albert Schweitzer”.
“Everybody can be great. Because anybody can serve. You don’t have to make your subject and your verb agree to serve….You don’t have to know the second theory of thermodynamics in physics to serve. You only need a heart full of grace. A soul generated by love- Martin Luther King, Jr”
“You may not have saved a lot of money in your life, but if you have saved a lot of heartaches for other folks, you are a pretty rich man-Seth Parker”
“Volunteers do not necessarily have the time; they just have the heart-Alizabeth Andrew”
Nga kyntu ia phi bad ia ngi lang to ngin iarap ia kiba donkam ka jingiarap la ka long ha kano kano ka bynta kaba ngi lah ban iarap bad ba ngi I donkam ha ka jingiaid lynti ka jong ngi bad lyngba kane ngin tei ruh ia la Shnong ka thaw, ka Dong ka thain bad ka ri ka Jaidbynriew.
Kaba Saw bad kaba khadduh “KI SAMLA BAD KA SAIN PYRTHEI (Youths and Politics)”: Kumba nga lah ong ha kaba sdang, Ki samla ki don kumba 30-40% tam ha ka Jylla ka jong ngi. Ka lah dei namar kata ba kum ki samla kiba lah don ia ka hok ban jied ia ki Nongmihkhmat ki jong ngi ba ngim dei shuh ban phai da ka lyngkdong ne khap la ki khmat ia ka jinglong jingman ha ka sain hima sima ha ka dong ka thain, ka Ri bad ka Jaidbynriew ka jong ngi. Ngi dei ban mih shakhmat ban pynpaw ia ka jingsngew ka jong ngi halor ki mat ki bapher bapher kiba ktah ia ka imlang sahlang lyngba ka polisi jong ki sorkar la ka long jong ka Jylla ne jong ka Ri India. Lada ma ngi ki 30-40% tam ki samla, ngi mih shakhmat ban pynpaw da kawei ka sur bad ka jingsngew ka jong ngi, ngi lah da kaba suk ban rai mano ki ban long ki nongmihkhmat bad ki nongshynshar ki jong ngi. Kaba donkam ka long ba ngin pyrkhat bad shim rai da ka jingshemphang, ka jingstad bad da ka jingpynshong nongrim ia ki mat ki jura jong ka dong ka thain, ka ri ka Jaidbynriew bad ka Jylla baroh kawei.
Kumba lah ong shakhmat, ki Samla kidei ka lawei jong ka Ri bad ka Jaidbyniew. Ki don ia ka bor ban tei lane ban pynjot pynpra ia ka. Kaba donkam ia ngi ka long ba ngin pynleit jingmut beit thik sha ka jingiaid lynti kaba beit bad kaba dei. Ngi hap ban trei shitom na ka bynta ban tei ia la jong ka Ri bad ka jaidbynriew. Ngi hap ban pynsawa jam la ka sur lada ngi lap bad shem ia kiei kiei kiba long pyrshah ia ka imlang sahlang bad ia ka Ri Ka Jaidbynriew. Ngi hap ieij bad burom ia la ka Jaidbynriew nyngkong eh bad hangta ngin sa lah ban tei ia ka Ri.