Ki Samla kin ym nep jabieng khlem da pyndonkam ïa ka Technology, ong u Conrad

Shillong, Ïaiong 06: U Myntri Rangbah ka Jylla Conrad Kongkal Sangma hynne ka sngi balang ula ban jur ba ki samla pule kin nym long satia kiba nep jabieng khlem da pyndonkam ïa ki kor ka juk ba mynta haba kren halor ki smart classroom bad ki digital learning aid.
U Myntri Rangbah ula kren ïa kane haba jingïalang sam ïa ki M-Tabs (PC Tablet) sha ki samla pule na ki skul ba pher bapher ka East Khasi Hills kaba long ha Soso Tham Auditorium.
U Conrad ula banjur ruh ïa ka jingkongsan jong kane ka prokram ka ban iarap shuh shuh ïa ki samla pule Higher Secondary da ki kor digital learning aid. U pyntip ba haduh 35,000 ngut ki samla pule hapoh ak Jylla kin sa ïoh ïa ki M-Tabs.
U Myntri Rangbah ka Jylla ula ong ba ka Sorkar Jylla kala ïohi ïa ka jingkongsan ki digital learning aid bad kala pyrshang katba don ki lad ban sam ïa kine ki kor sha ki samla pule.
Haba pynkynmaw ïa ka jingïakren jong u bad ki samla pule ha ki skul nongkyndong, u Conrad ula ong ba ki samla pule kila shong ha ki kamra long klas da ka jingkyrmen ba kin kham nep ka jabieng hynrei khlem da pyndonkam ïa ki kor ka juk bad ki jinghikai lyngba ki kor online kan long kaba eh shibun.
“Ka khubor jong nga hi ka long kaba shai.Phi hap ban pyndonkam ïa ki kor ka juk, ban shu shong ha ki kamra long klas kan nym pynnep jabieng satia ïa phi” ula ban jur haba kyrpad ïa ki samla pule ban pyndonkam bha ïa ki M-Tabs na ka bynta ka jingpule jong ki.
“Ki kor ka juk mynta ki dei kiba bha kat kum ka jingnang pyndonkam ïa ki. Lada phi pyrkhat ba tang bala bat ïa ki tablet lane buh ha pla kin pynnep jabieng ïa phi, kane kan ym iarap satia. Phi hap ban nang pyndonakm ba kin long kiba ai jingmyntoi” ula ong.
Haba ong ba ka degital learing ka long kaba kongsan bha, u Conrad ula ong “Ki kor ka juk mynta kin iarap ïa phi ha kiba bun ki bynta ki ba phim lah satia ban mutdur. Namar kata, sngewbha da pyndonkam thikna bha ïa ki ban pyn thikna ba kin ïoh ïa ki jingmyntoi”.
U Conrad ula pyntip ruh ha kane ka jingïalang ba ka Sorkar Jylla shen kan sa pyntreikam ïa ka State Wide Area Network ban pynthikna ba ka kor internet kan long kaba khlaiñ ha ka Jylla baroh kawei. U ong ba baroh ki jaka pule ha Jylla kin sa ïoh noh ïa ki internet kiba biang.