Ki rynsan Social Media bad ka imlang sahlang
![](https://mawphor.com/wp-content/uploads/2022/02/editorial.jpg)
Ka jingroi jong ki lad pathai khubor ne kata ka rynsan ban pynpaw paidbah lyngba jong ka Internet kaba dei kawei na ka jingstad Teknoloji jong kane ka juk mynta ka la long shisha ka kabu ia kiba bun bah ban pynpaw pyrthei ïalade. Ka mynnor kan dap da ki jinglyngngoh suda ban ïohi ïa ka mynta ba ki briew ki lah ban kamai bad kyrshan jakpoh ïalade tang lyngba jong ki lad die khubor ba la tip kum ka SOCIAL MEDIA. Hynrei ka long kaei kaei kaba sngewkhia bad sngewsih ban ïohi bad ïoh sngew bad ha kine ki sngi ka la don ka jingpyndonkam bakla kaba jur bha ïa kane ka rynsan SOCIAL MEDIA, ka jinghiar ka akor ka burom jong ki Khasi bad ka jingkiew ka jinglong lyngkar bad ka jingkhlem akor ban kren laitlan laitler wat da ki ktien sih ktien sang suda ha ki Facebook, YouTube bad kiwei pat ki rynsan.
Ka long kaba lyngngoh ban ïohi ba ym don satia mano mano ban leh ei ei ïa kito ki briew kiba mlien ban leh ïa ki kam lyngkar lyngba jong kitei ki rynsan SOCIAL MEDIA, hynrei la ïohi ba kiba bun ki dkhot jong ka imlang sahlang ki ïakyrsum pynban ha kiba kum kitei ki kam kiba jaboh jakhlia. Ka long ruh kaei kaei kaba ilyngngoh shisha ba ki don ki briew kiba nud wat ban kren jot kren tohmet wat ïa ki nongialam niam bad ki riew donburom ruh. Hynrei ym shym la don mano mano ban shim khia ban khanglad ïa kiba kum kitei ki briew bad kane ka long thik kumba ha ka rynsan SOCIAL MEDIA ym don satia ka imlang sahlang bad kane ka pyni ïa ka lawei kaba dum wat ïa ka jaidbynriew rit paid kaba tang shi troh jong ka jaidbynriew Khasi.
Ha ka jingshisha hangne ha ka imlang sahlang ha ka jaidbynriew Khasi jong ngi ki la don shibun bah kita ki Sengbhalang kiba ïai pynpaw na ka por sha ka por ïa kata ka jingsngewkhia jong ki halor ka jinglong jingman jong ka jinghiar ka akor ka burom ha kine ki sngi. Hynrei katba ïa kitei kiba im pat ban leh ïa ki kam kiba ktah shisha ïa ka burom ka akor jong ka jaidbynriew lyngba jong kitei ki rynsan SOCIAL MEDIA pat ngim pat shym la ïohi ne sakhi ban don ba la leh ei ei. Ha ka jingshisha ka imlang sahlang ka donkam shisha ïa ki sengbhalang ban peit lem ïa kum kitei ki kam leh tam lyngba ki rynsan SOCIAL MEDIA.
Ka long kaba ym lah ban pyrkhat bad wat ki kynthei khynnah ruh ki nud ban tim sih timsang bad kren katba mon lyngba jong ka rynsan YouTube, Instagram bad kiwei pat. Ym lah ban mutdur bad ki Khasi jong ngi kin nud wat ban pyni khlemraiñ ne khlem akor lyngba jong kitei ki rynsan SOCIAL MEDIA. Nalor ba la leh ïa katei ka kam shabar na la ka jong ka jylla bad ka kren beiñ pat ïa la ka jong ka jaidbynriew bad pynpaw sngew sarong ba ki ïoh ban im sha bar jylla bad leh kampoh bad ki bar jylla khlem da kheiñ shuh ïa ka raiñ ka rem, hynrei katta katba nangshah kren katta ki nang sngew sarong pynban.
Kum ka jaidbynriew Khasi bad kum ki briew kiba ieit ïa la ka jong ka imlang sahlang, ka la dei ba por ba ngin peit khmat sha kine ki tnad SOCIAL MEDIA. Khamtam kum ki Sengbhalang ka la dei ka por ba kin leh ei ei, ban khanglad ban maham ïa baroh kito kiba ju mlien ban thad rong ïa la ka jong ka jaidbynriew da ka jingleh kaba i khlemraiñ khlem akor lyngba ki rynsan SOCIAL MEDIA. Namar ba ka jingleh ïa kitei ki jait kam kan ym kut tang ha ki SOCIAL MEDIA hynrei ka dei kaba jia ha ka jingim kaba shisha bad kaba la rekod pat lyngba ki dur video bad thad paidbah ym satia ïa kita ki nongleh, hynrei ka dei ka jingthadlad thadrong ïa kane ka jaidbynriew rit paid jong ka jaidbynriew Khasi.
*********