Nongpoh, Risaw 24: Hapdeng ka jingiphuh iphieng, ka Karbi Cultural Society, Meghalaya Zone mynta ka sngi kala pynkut noh ïaka tamasa ki samla Karbi bala tip kum ka 31st Zonal Karbi Youth Festival kaba la sdang naduh hynnin ka sngi ha Auditorium Hall jong ka AMKA kaba don ha Umwang, hadien ba ki paid Karbi na kylleng ka jylla bad wat naka thaiñ Shatei Lam Mihngi kila wan ban shim bynta ha katei ka tamasa.
Ïa katei ka tamasa la wan ban pynhap pyrda noh ïaka mynta ka sngi da u Bah Balajied Ranee MDC ka Nongpoh Constituency kum u kongsan, ryngkat u Sunil Tokbi Organising Secretary KCS Central Body I/c Meghalaya kum u symbud kongsan haka jingdonlang u Bah Albinus Timung President ka Karbi Cultural Society Meghalaya Zone, RR Ronghang President ka AMKA, Bah Arnold Syngkli President ka RBYDSO, Bah Sylvanus Malai President ka NKU, ki longsan mansan, ki bongthai, naki raid bapher bapher bad kiwei kiwei ki riew rangbah.
Ka jingthmu jong katei ka tamasa ka long ban wanrah ka jingïatylli kawei hapdeng ki jaitbynriew Karbi kiba don ha kylleng ki jaka khamtam ban dang pynim bad pynneh pynsah ïaki riti dustur bad ki kolshor tynrai jong ki jaitbynriew karbi ba kim dei ban klet lane ba kin duh kin dam noh hynrei ban pynneh pateng la pateng bad kane ka dei ka sien kaba ar bala pynlong kum katei ka tamasa ki samla haka jylla Meghalaya.
Haba kren ha katei ka sngi naka liang u Bah Balajied Ranee MDC ka Nongpoh u la ai ka jingïaroh ïaka Karbi Cultural Society Meghalaya Zone kala shim ïa katei ka sienjam ban pynlong ïa kum ka jingïakynduh lang ki samla haka sien kaba ar bad kane ka pyni ïaka jingïatylli jong ki jaitbynriew Karbi haka jylla bad wat shabar jylla bad lyngba kum katei ka lympung lah ruh ban sakhi ïaka jingriew spah ka kolshor, ka riti ka dustur jong ki jaitbynriew Karbi kiba dang lah ban pynim bad pynneh pynsah haduh mynta mynne.
U la ong ruh ba bun naki riti ki dustur bad ki kolshor tynrai ki duh ki dam noh namar ka jingbud tynneng ïa ka jong kiwei ha kaba u la pynpaw ruh ba ha ri India ki don kumba 700 tylli ki jaitbynriew bala ithuh da ka sorkar India katkum ka article 342 jong ka riti synshar ka ri India, bad tang ha ka jylla Meghalaya kim duna ïaki 52 tylli ki tribe hynrei napdeng jong kine kila don ruh kiba la jah noh bad ka daw ka long ba lehse ka dei ka jingbud tynneng ïaka jong kiwei namar teng teng bun naki khun samla ki lehraiñ ban kren ïaka ktien lajong, ban burom ïaka riti ka dustur bad sngewtynnad pat ban bud ïa ka jong kiwei bad kane ka dei kaba ma haduh katta katta lada ngi kwah ba ka jaitbynriew kan im.
U la kyntu ruh ïaki paid Karbi ba ki dei ban ïatylli ban ïeid bad burom mar kylliang, khamtam ban pynim bad pynneh pynsah ïaki riti ki dustur bala buh naduh u mynbarim khnang ba kin nym duh noh na kane ka sla pyrthei, u la bynrap.
Ha katei ka sngi naka liang u Bah Balajied Ranee u la ioh ruh ban aiti kumba 300 tylli ki shuki sha ka All Meghalaya Karbi Association ba kin ioh ban pyndonkam haki jingïalang bapher bapher.
