Nongstoiñ, Ïaïong 18: Ka election bad jied ïa ki nongmihkhmat sha ka Ïingdorbar Thawaiñ ka la jan bad une bnai u Ïaïong bad Jymmang, ka dei ka por ba ki paitbah nongshong shnong ki im ha ka jingsyier mynsiem bad kim ju ïohthiah suk ha ki por mynmiet, namar ka jingsheptieng ïa ka erïong bad u phria kuba ka la jia ha kylleng ki jaka hapoh ka jylla.
Ha kaba ïadei bad ka jingshah syllad erïong ha ki katto katne ki bynta jong ka West Khasi Hills ha ka miet sngi saitjaiñ bad miet sngi u Blei, katto katne ngut ki khynnah samla ki bym kwah ban pynpaw kyrteng ïalade haba ïakren bad u nongthoh khubor mynta ka sngi, katba ki dang wan thied tarpaulin ban sop ïa ki ïing jong ki kiba la peit na ka jingkhyrwit u phria ha ka miet sngi saitjaiñ, ki la ong ba wat la ki riew saiñ pyrthei kim pat wan mih ban ai jingïarap ha ki shnong jong ki ruh, ki la ïoh jingtip ba kin sa wan ha kine ki sngi tangba kim pat tip pat la kiei ki jait jingïarap ba kin ai.
Kitei ki samla ki la ong ba kat kiba wan ai jingïarap kin pdiang beit, tangba kiba wan ai ki dei ban sngewthuh ba ha kiba kum kine ki jingjia, wat ki sengbhalang ki bym dei ki riewsaiñ pyrthei ruh ki ju leit ai jingïarap ïa ki lanot kiba ngat ha ki jingjia bapher bapher la ka dei ha kaba pluh ïng ne kiwei kiwei ki jingjia. Ki la ong ba lada ki dei ki nongmihkhmat lei lei ki don ka hok ban ïarap, namar ha ki por ïalap elekshon haba sngap ïa ki jingkular jong ki, la sngew dei ba wat ïa u bnai ruh ki lah ban wanrah bad buh ha phyllaw ïing.
Ki la ong ba ka jingkular ïa ki madan ïalehkai, ki surok, ki skul, ka um bam umdih, ki jaka sumar, ka thungkam thungjam, ki dei ki mat kiba ha khmat duh ba ki ju pyrta ha ki por ïalap elekshon, hynrei haduh ban da kut san snem kitei ki jingkular jong ki kim ju lar kam satia. Ki la ong ba lada jia ba ki wan ruh kim dei ban pynïaryngkat dor ïa ka jingïarap jong ki bad ka shi vote na ka bynta san snem.
Namar lada ki ai shi lak tyngka kawei ka ïing lada ki don san ngut ki nonghep vote, ka dang shong dor tang arphew hajar shi vote bad lada kheiñ arphew hajar ha ki san snem ka dang long tang saw hajar shi snem uwei u nongthep vote bad sawhajar tyngka ha ki khatar bnai uwei u nongthep vote u dan shong dor tang laispah tyngka tam ha ka shibnai bad lada khein ha ka shisngi uwei u nongthep vote u dang shong dor tang kumba khatwei tyngka shisngi. Katba lada leit bylla sngi mynta ka dor kaba rit eh ka long lai spah tyngka bad lada dei ki nongtrei misteri lei lei ynnai ïakren, namar ki don kiba san spah tyngka haduh ar hajar tyngka shi sngi.
