Nongpoh, Naitung 31 : U Bah Sosthenes Sohtun MLA ka Jirang mynta ka sngi u la kyntu ïaki Rangbah Shnong ban long kiba peitngor ha la ki jong ki shnong ki thaw namar ki tip khambha ïaki nongshong shnong bad ki briew ba thymmai kiba wan rung hadien ka jingkhynra ka sorkar Assam ïaki briew kiba sah beaiñ ha katei ka jylla.
Haba kren sha ki lad pathai khubor u la ong ba ki Rangbah Shnong ki don ka iktiar kaba khlaiñ ban khanglad ïaka jingwan rung beaiñ jong ki briew nabar sha ki shnong ki thaw, khamtam haka thaiñ Byrnihat kaba dei ka thaiñ khappud bad ka Assam.
U la ong ruh ba kane ka dei ka por ba hap ban shimkhia naduh u nongmihkhmat, ki Dorbar Shnong bad kum u MLA un sa buh ruh ka jingkyrpad wat sha ki bor district halor kane ka mat, bad khamtam ki nongïalam shnong ban tehlakam ïaka jingsah beaiñ jong ki briew ba nabar, kumba ka thaiñ Byrnihat ka dei ruh kaba bun bha ki karkhana ioh lehse kito kiba shah kyndang kin wan haka dur ki nongtrei bylla bad kumta ter ter.
U la kyrpad ruh ïaki bor district bad wat ki Rangbah Shnong ba ki hap ban talasi ïaki karkhana bad ban tehlakam ruh ïaki nongshongwai kiba nabar ka jylla namar kane kan wanrah ka jingma ïaka shnong ka thaw ha kiba bun ki liang.
