Ki Pulit Meghalaya bad Assam ki hap ban kynran dien, rai ban buh da ki CRPF haki jaka ïakajia pud

Shillong, Nailur 30 : Ka sorkar Meghalaya bad Assam mynta ka Sngi Saitjain ki la rai ban sdang pruid noh ïa u pud u sam ha ki hynriew tylli ki jaka ba la dep ïasoi MOU ha ka Wat kaba nyngkong bad ïa kane la sdang shwa na Hahim. Ha kajuh kapor ki la rai ruh ba nangne sha khmat ha kito ki jaka ba jur ka jingïakajia pud yn ym pynap pahara shuh da ki pulit Meghalaya ne Assam hynrei yn wanrah noh da ki CRPF ne kino kino ki bor pahara jong ka sorkar pdeng khnang ban lait na kano kano ka jingïashah liang.
ïa kane ka rai la shim mynta ka sngi ha ka jingïalang hapdeng u Myntri Rangbah ka Meghalaya U Conrad K Sangma bad ka Kynhun jong u kumjuh ruh u Myntri Rangbah ka Assam U Himanta Biswa Sarma lem bad ka kynhun jongu kaba la long ha Assam State Guest House, Koinadhara, Khanapara.
Kine ki arngut ki Myntri Rangbah ki la rai ruh ban leit jurip lang ïa ka Khanduli bad Psiar ha ka taiew ba khatduh jong u bnai Risaw.
Ki la rai ruh ba ha kane ka Wat kaba ar kin ïa pynbeit shwa ïa ki lai tylli ki jaka ïa kajia pud na ki hynriew tylli bad kita ki long ka Langpih ha West Khasi Hills , ka Borduar bad Deshdoomreah ha Ri Bhoi District.
Haba kren sha ki lad pathai khubor u Myntri Rangbah ka jylla u Conrad K Sangma u la ong “ Ngi sngewkmen eh ban pyntip ïa ki paid nongshong shnong ka Meghalaya bad Assam ba hadien ka jingïatai bad jingïamir kaba jrong bha mynta ka sngi la rai ban sdang sieh mawpud noh shwa ha ki hynriew tylli ki jaka ba la dep ïasoi MOU ha ka Wat kaba Nyngkong hakhmat u Myntri Kam Pohiing ka ri u Amit Shah”.
“Mynta ka sngi ngi la mynjur ruh ïa ka jingpruid pud ha Hahim ha kaba ïa ka sorjamin la leh da ka Survey of India ha ka jingïadon lang ki ophisar na ka sorkar Assam bad Meghalaya” Ong biang u Conrad.
Ula ïathuh shuh shuh ba ïa ka jingpruid pud pat ha ki san tylli ki jaka kata Upper Tarabari, Gizang, Boklapara, Khanapara-Pilangkata bad Ratachera da ka Survey of India ha ka jingïadon lang ki ophisar jongka sorkar Assam bad Meghalaya ruh dei ban pyndep noh hapoh ka 31 tarik Nohprah mynta u snem.
U la ïathuh ba ki ar jylla ki la pyrshang ban pynsted katba lah ban pyndep ïa ka jingpynbeit pud ha kiwei ki jaka ba dang sahteng. “ Ngin pyrshang kloi katba lah ban pyndep shwa ha ki lai tylli ki jaka ba la kdew mynshwa bad halor kane la bthah ïa ki Regional Committee ba kin pyndep noh kloi ïa ki kaiphod” ong u Conrad.
Haba pynpaw ka jingsngewdiaw halor ki jingïakynad kaba la jia dang shen ha Block I kata ha Khanduli- Psiar, West Jaintia Hills bad kumjuh ruh bad ka Karbi Anglong, u Sangma u la ïathuh ba la ïakren sani bha halor kine ki jingjia ha ka jingïalang bad la ïa rai lang ba yn wanrah noh da ki CRPF ha kitei ki jaka ym shuh ban dang buh da ki pulit Meghalaya ne Assam.
U la ïathuh “Baroh arliang mamla ngi la ïarai lang ban weng noh ïa ki bor pulit jong ngi na kine ki jaka bad la leh ïa kane khnang ba ki paidbah kin ïoh ka jingshaniah. ïa kane la leh kum ka dak ban pyni sha ki paidbah ba ki ar sorkar kim don kano kano ka jingshah liang bad la wanrah da ki CRPF ki bym don ka jingshah liang khnang ban lait na kino kino ki jingïa kynad bad jingkulmar” ong biang u Conrad Sangma.
Ha kajuh ka por la bthah ruh ïa ki Regional Committee jong ki ar jylla ba kin leit jurip sha kitei ki jaka ban pynthikna ba ki paidbah kin ïa shongsuk shongsaiñ. “ U Myntri Rangbah ka Assam bad ma nga ruh ngi la rai ban leit jurip ïa ka Khanduli bad Psiar ha ka taiew ba khatduh u Risaw mynta u snem” ong biang u Sangma.
Na ka liang u Himanta Biswa Sarma u la ong ba ka jingïalang ka long kaba ïa sngewthuh jingmut bha bad ong “ Ki Pulit ka Assam dang shen ki la buh ïa ka kawei ka Out Post ha Khanduli- Psiar bad kane ka long hajan ka Police Out Post jongka Meghalaya bad kane ka la pynlong ïa ki arliang mamla ban ïa shrai bad kwah ïa pyni bor. Kumta ngi la ïarai ba ha kitei ki jaka yn buh noh da ki CRPF bad ba ki pulit ka Meghalaya ruh kin buh noh kham shadien ïa ka Out Post khnang ban lait na kino kino ki jingïapher jingmut. Ha ki jaka ba jngai kumba 200-300 meter lah ban buh da ki pulit hynrei hakhmat eh kin don beit ki CRPF”.
“ Ngi la rai ruh ban ïa pynbeit shwa ïa ki lai tylli ki jaka kloi katba lah kata ka Langpih, Borduar bad Deshdoomreah. Halor kane la aiti ruh ha ki Regional Committee ba kin leh kloi ïa kaba donkam khnang ba ngin shim rai ha ka kyrdan jong ngi ki Myntri Rangbah jong ki ar jylla” ong biang u Himanta.
U la ïathuh ba ka Survey of India ka la dep sorjamin ha Hahim bad shen yn pynïeng noh ïa ki mawpud da baroh ar ki sorkar jylla.
“Mynta ka sngi ki nongmihkhmat na ka tnad Survey of India ruh ki iadon lang ha ka jingïalang bad ngi la kyrpad ïa ki ba kin pynkloi ïaka jingpruid laiñ ïa u pud u sam sa ha ki san tylli ki jaka la kumno kumno ruh hapoh ka 31 tarik Lber. Ki don katto katne ki bynta ba hap ban pynbeit ha ka shnong Mallang Salbari bad ngi la bthah ïa ki ophisar na ka liang ka Assam ba kin kham pynjynsur mynsiem ha ka jingpruid ïa u pud u sam ha katei ka shnong khnang ba ngin lah ban ïa pynbeit da ka jngiasnewthuh jingmut kumba ngi la leh ha Tarabari namar ngi kwah ban pyndep noh ïa kane ka kam” ong biang u Himanta.
“ Nga ngeit skhem ba ka jingleit jurip ïaka Khanduli bad Psiar ha ka taiew ba khatduh u Risaw kan wanrah ka jingseisoh namar hadien kane ngin sa ïa shong pyrkhat kumno ban pynsngewthuh ïa ki paidbah. Ngin leit ïakren bad pynsngewthuh ïa ki khnang ba ïa kine ki lai tylli kiba sah ruh yn lah ban pynbeit kloi noh.
Halor ka jingshah thombor ki Khasi Pnar haka thaiñ Lapangap naka liang ki 2 myntri Rangbah kila kren shai ba yn bthah ïa ki 2 DC ka Meghalaya bad Assam ban pynbeit bad lada jia ba kano kano ka huri hura kan mih naka liang ki Regional Committee kin sa shimkhia ban pynbeit ïa katei ka kam ban wanrah ïaka shongsuk shongsaiñ khamtam ba ki khasi pnar kin ioh ban ot ïa jingthung jingtep khamtam u kba ba kila thung.