Shillong, Naitung, 23: U Director General of Police (DGP) ka jylla u Dr. LR Bishnoi ha ka sngi Saitjaiñ u la ong ba ka jingleit khynra jong ki Pulit ïa ka Rimpu Bagan ka Farm House jong u MDC ka Tura Constituency u Bernard N. Marak ka long hadien ba ki Pulit ka West Garo Hills District ki la pyndep hi la ka jong ka kamram khlem da ïoh hukum nangno nangno ruh.
Kane ka jingpynshai jong u Dr. Bishnoi ka long hadien ba u Bernard N. Marak u la kynnoh ba dei ka jinghukum jong u Myntri Rangbah ka Jylla u Conrad Kongkal Sangma ïa ka tnat Pulit ban leit khynra ïa ka Rimpu Bagan.
“Ki pulit ka jylla ki pyndep hok la ka kamram khlem da ïoh hukum nangno nangno ruh,” ong u DGP ha ka jingïakren bad ki lad pathai khubor.
U la ïathuh ba ha kane ka jingkhynra ki Pulit ki la ïoh kurup haduh 400 tylli ki bilor kyaid ba dang dap bad ong ba kane ka jaka ruh ka dei kaba la shu pynïaid be-aiñ khlem license bad ka jinglap ïa ki jri sop bun song bym pat pyndonkam ka pyni shai ba kane ka jaka ka ladei shisha ka ktem awria.
Ki Pulit ka West Garo Hills ki la pynlong ïa ka jingkhynra ha kane ka Farm House halor ka jingbuddien na ka jingmudui jong ki bahaing hasem jong kawei ka khynnah kaba la shah rah jubor sha kane ka jaka ha u bnai Rymphang bad shah leh be-ijot la bunbun sien.
U DGP u la ïathuh ba ki Pulit ki la pynlong ïa ka jingthwet kaba jur ban ïoh kem ïa u Bernard hynrei haduh mynta kim pat lapdien satia ïa u wat hadien ba ki leit wad sha iing sah jong u sha Tura bad ha Shillong.
“Katkum ka jingbuddien kaba ngi la tohkit na ka Moble Phone jong u ka jaka ba u don khatduh ka dei ha ki jaka hajan Guwahati hynrei hadien katto katne por ka Mobile Phone ka la lip noh tangba ki Pulit kim shong kli kti hynrei ki dang pynlong ka jingthwet kaba jur ban ïohkem ïa u,” ïathuh u DGP.
Shuh shuh u la ïathuh ruh ba ki Pulit ki la register case halor kane ka jingjia ha Tura Women Police Station bad ki la pynngat ha ki katto katne ki kyndon jong ka Immoral Trafficking Act, 1956.
Ha kaba ïadei bad kane ka jingjia, ki Pulit ki la ïohkem haduh 73 ngut na katei ka Farm House nalor kaba ïoh pyllait im ruh san ngut ki khynnah rit.
