Shillong, Naitung 29 : U Symbud Myntri Rangbah ka jylla u bah Prestone Tynsong u la ong ba ki bor pulit ki khlem ïaid lait ïa ka aiñ bad ki khlem pyndik ïa ki dkhot ka BJP hynrei kaei kaba ki leh ka long da ka lynti jongka aiñ ba kino kino kiba paw kyrteng hadien ka jingkhynra ïa ka ïing basa u Bernard Marak ka Rimpu Bagan ka long ban tohkit bniah ïaki. Kane kan long salonsar ïa baroh kat kum ka aiñ ym don jingmap la u dei u dkhot ka NPP, UDP, BJP ne ïano ïano ruh namar baroh ïa ryngkat hakhmat ka aiñ bad ym don uwei ruh uba halor ka aiñ.
“ Ngam tharai ba kan long ka mat kaba ktah haduh katta katta kumba la kynnoh da ka BJP namar haba ka jingtohkit ka dang ïaid ka dei ka kamram jongki pulit ban khot ïano ïano na kiba paw kyrteng ban tohkit ban lap ïaki jingshisha. Kumta ka jingkhot hajir ne rah ïano ïano kiba paw kyrteng ban tohkit kam dei ka jingthombor ne jingpyndik ka dei ka kamram jong ki pulit kumta kine ki dei ki jingkynnoh bym don nongrim da ki nongïalam ka BJP” ong u bah Prestone.
“ Ngam pat ju ïohi mynno mynno ruh ba ki pulit kin leit sha ophis ka BJP ban thombor ne pyndik ïano ïano ruh ne shu kem beit na phang, kum kata kam jia hi ruh bad kine baroh ki dei tang ki jingkynnoh ban ïalam bakla ïaki paidbah namar ki dei ki jingmynnoh kiba ym don nongrim hangno hangno ruh” ong u Symbud Myntri Rangbah.
Ki nongïalam ka BJP kim lah ban shu ong ba u Vice President jongki u Bernard Marak u dei uba hok bad shida haba ki la ïohi ia ki sakhi sabut ba ki pulit ki la ïoh kurup bad ïoh pyllait im ïa ki khynnah rit ba la set ha kawei na ki kamra ha katei ka ïing basa. Namar kumba long mynta ka jingtohkit ka dang ïaid beit shakhmat kumta kat kiba paw kyrteng ki pulit ki hap beit haba khot hajir ne ban leit rah sha police station ban tohkit bniah shuh shuh ïaki. Hadien ba la tohkit lada lap pat ba kim ïadon kti ei ei ki pulit ki sa pyllait noh ïaki kumta kam dei satia ka jingleh donbor da ki pulit.
“ Kumta nga kyntu ïa ki nongialam ka BJP wat ïaleh politik ïa kane ka kam long kiba jai jai ap ïa ka jingtohkit kan dep ïoh ka kyrtoh kylla ïaki hadien habud. Namar kumba ngi la ïohi kaei kaba la jia ha West Bengal tharai tang shi taiew ka nongïalam ba hakhlieh duh jongka TMC ka la pynhiar shuki ïa uwei na ki myntri jongka. Haba kumne hato kane ka dei ka kam ban ïaleh politik em kam dei satia hynrei ka leh hadien ba ka lap ïa ki jingshisha baroh. Kumta kaei kaba nga mut ban ong ka long kaba shai to ngin ïa ap haduh ban da dep ka jingtokit ym ban shu kynnoh ba ki pulit ki leh donbor ne pyndik halor ka hukum jong uta uta ha ka jingkhynra ïa katei ka ïing basa. Kane ka long kaba bakla kumta ïai ap shipor ai ba ka jingtohkit kan ïaid bad pyndep khnang ba ki jingshisha kin paw lut” ong u bah Pretone.
Hadien ka jingtohkit ïaka kaiphod yn sa phah sha ka ïing bishar bad dei ka ïing bishar ka ban shim rai la ka long kumno kumno ruh. “ Lada ki sngew pyrshah halor kane ka jingjia khamtam ba ka jia ïa u Vice President jongki ka shong ha ki ngam lah ban ong ei ei hynrei kaei ka rai jongka sorkar MDA ka long ban neh haduh kaba kut san snem bad lada ki BJP kim hun ne sngewtynnad shuh tang namar ine i jingjia ha Tura, ïa kata ngam lah ban ong ei ei” Pynkut u Symbud Myntri Rangbah.
