Shillong, K’Lyngkot 02 : U Bah H H Mohrmen uba dei ruh kum u riewshemphang, u Dr literature uba la pule bniah bha halor ka jingim jong u Woh Kiang Nangbah u la ong ba ka jingburom ïa u ka dei halor ki kam kiba u la leh na ka bynta ka ri bad ka jaitbynriew.
“Nga dei uwei na kiba ju la wadbniah ha kaba ïadei bad ka jingim jong u Woh Kiang Nangbah bad kane ka dei ka sien kaba ar ban shah khot sngewbha ha kane ka prokram. Kaei ka khubor ba ngi tip na ka jingim jong u Kiang Nangbah. Balei ngi kynmaw ïa u ne ban burom ïa u. Kane ka jingkylli kam dei tang ka khana hynrei kadei kaba ai mynsiem. Ka jingïathuh khana kaba da ka ktien ka la hiar ha ka pateng jong ka jaitbynriew. Katkum ka jingpule nga shem ba ki phareng ki kheiñ ïa u kum u runar, hynrei lada ngi pynleit jingmut ha ki jingthoh la shem ba udei u hero,” ong u Bah H Mohrmen.
“Kaei kaba pynlong ïa u kum u riewkhraw ka long namar u ïaleh na ka bynta ka nongrim bad ka daw,” u la ong.
Na ka liang jong u la ong ba une u Syiem u la ïeng ban ïakhun na ka bynta ka jingshah ban beiñ ha ki dohlieh.
“U Kiang Nangbah tang da u khnam bad ka ryntieh u la ïakhun ïa ki dohlieh na ka daw jong ka jaitbynriew bad kane kadei ka jingshlur jong u ha kaba ha ka snem 1825 la kurup ki dohlieh ïa ka hima Jaiñtia. U Kiang Nangbah u la dawa ïa ka hok ban ïoh biang ïa ka Hima Jaiñtia, u la ïakhun na ka bynta ka hok ki nongshong shnong. U Kiang Nangbah u la sngap ïa ka jingkhot jong ki paidbah ban ïada ïa ka ri bad ka jaitbynriew. Ka jingim jong u ka hikai ïa ngi ban ïakhun ïa ka jingshisha bad na ka bynta ka hok ban long uba shlur bad ban ïeng ha ka jingshisha,” u la ong.
Ha kane ka sngi ka la don ruh ka jingsam khusnam ïa ki samla ba pass bha ha ki kyrdan bapher bapher bad ka la don ruh ka jingpynlait ïa ka calendar ne ka kot tarik 2025 jong ka Seiñraij.
