Ki paidbah mynta ki la sngewtynnad ba la mad ïa ki surok ba bha, ïa kaba kim pat ju ïoh mad: Timothy

Shillong, K’Lyngkot 08: U Myntri sorkar u Timothy D Shira u la pynpaw ba ki surok ba kongsan tam kiba la dang ïa ka jingtrei kam ki ban pynïasoh ïa ka constituency jong u ka Resubelpara, kadei ka surok na Songsak – Mendipathar bad Tura – Resubelpara sha Berubari ka ban pynïasoh bad ka National Highway 51 bad sa kawei ka surok kadei na Resutekachang sha Anugre ban pynïasoh bad ka NH 51.
U Shira u la ong ba hapoh une u snem un dang shna ïa ka surok na Songsak – Mendipathar bad ha u snem ban wan un sa sdang sa ïa ka surok na Songsak- Resutekachang ka ban poi sha Anugre bad ka jinglut kan long T. 135 klur ïa kaba yn bei pisa na ka World Bank.
U la ïathuh ba ki surok ha ka constituency jong u naduh Berubari sha Mendipathar bad Mendipathar sha Damra ki long kiba la jot rathai hynrei ïa kine ki surok la dep ban shna.
“Ki paidbah mynta ki la sngewtynnad bha ïa ki surok bha. Kim pat ju sngewtynnad mynno mynno ruh kumba kila sngewtynnad mynta ha kaba ïadei bad kane ka surok”, la ong u Shira.
U myntri sorkar bad uba dei ruh u MLA ka thain u la ong ba da kaba shna ïa ki surok lyngba ki shnong ki nongshong shnong ki la ioh jingmyntoi na ki.
U la ïathuh ruh ba ka Mendipathar mynta ka la don ïa ka Bottling Plant kaba la ai kam ai jam ïa ki samla trai shnong kaba pyn myntoi shisha ïa ki trai shnong.
“Ki don bun ki nongtrei jong ka Company kiba sah ha ki ïing wai ha Mendipathar bad kumta kane kala ïarap shibun ïa ki briew kiba ai wai ïing namar ba kila ïoh ka jingmyntoi na kine ki nongtrei,” la bynrap biang u Shira.