Ki paidbah ki don ka hok ban tip la ki kam pynroi ki poi neem sha kiba dei hok: Kyrmen Shylla

Shillong, Naiwieng 19 : U MLA ka UDP na Khliehriat constituency, Bah Kyrmen Shylla u la ong ba kam don kano kano ka jingpyrshah ïa ka jingtohkit lada ki paidbah ki shem bad ki sngew ba ka song kam pynroi kam pat poi sha kito kiba dei hok ban ïoh.
U Bah Kyrmen uba dei ruh u Adviser jong ka tnad Mining & Geology ka sorkar jylla u la kren ïa kane hadien khyndiat sngi ba ka Voice of the People’s Party ka la dawa ban don ka jingtohkit ba laitluid halor ka jingpyntreikam ïa ka skim MLA ha Meghalaya.
“Ha ka jingshisha haba ïadei bad ki skhim jong ngi, kiba la dei ban pynpoi sha ki paidbah ha ki constituency jong ngi, katkum ka jingsngew shimet jong nga ka long ba kano kano kaba dei ka hok jong ki paidbah ka hap ban leit sha ki. Hynrei lada ngi sngew ba ym shym la pynpoi, ka sorkar bad ki paidbah ki don ka hok ban dawa ïa ka jingtohkit kaba laitluid,” u la ong haba kren bad ki lad pathai khubor.
U Bah Kyrmen u la ong ruh ba khamtam na ka bynta jong u, u ju sngewtynnad ba ki paidbah kin tip ïa kaei kaba u la leh bad ba ki skhim ki poi sha ki ha ka por kaba biang. “Khlem artatien ka jingpynslem teng teng ka ju jïa hynrei kam dei kaba la thmu khnang,” u la bynrap.
Shuh shuh haba jubab halor ka jingkylli u Bah Kyrmen Shylla u la ong, “Ym don eiei ban buhrieh. Kumta haba y mdon ei ei ban buhrieh, ka RTI ka dei kaba paka tam ha ka jaka ban phah tohkit. Ka long kaba suk bha pan beit da ka RTI na ophis u BDO bad phin sa ïoh lut.”
U Bah Kyrmen u la ong ruh ba wat ka shi peisa jong kane ka pisa paidbah ka dei ban leit sha ki paidbah. “Lada don kiba artatien ïa nga ne ïano ïano, ka sorkar ka don ka hok ban wad ban lap ïa kaei kaba la jia.”
Katkum ka jingïathuh jong u, uwei pa uwei u MLA u ïoh 2.5 klur tyngka ha ka shisnem ha man kawei pa kawei ka constituency bad kumta u banjur ruhba kane ka pisa ka dei ban poi sha ki paidbah ym ban pynphai shawei pat.