Ki paid Hindu ba sah ha Meghalaya ki dei ban pyrshah ïa ki kynhun khang shohdoh masi : HNLC

Shillong, Nailur 29 : Ka Hynniewtrep National Liberation Council (HNLC) ha ka sngi U Blei ka la kyntu ïa baroh ki paid Hindu ba sah ha Meghalaya ba kin pyrshah ïa ki kynhun khang shohdoh masi ba kin ïoh rung sha ka jylla.
“Kadei ka kamram jong ki paid Hindu ha Meghalaya ba kin pyrshah ïa ki kynhun khang shohdoh masi b akin rung sha ka jaka jongngi da ka jingthmu ban pynlong ïa ki rally lane kino kino ki kam pyrshah ïa ka jingsngew jong ki trai shnong. Ka HNLC bad ki paidbah ki ym ailad satia ïa kane ka jingwan tuklar ïa ka rukom bam rukom dih tynrai jongngi,” ong u General Secretary cum Publicity Secretary ka HNLC, Bah Sainkupar Nongtraw ha ka kyrwoh.
Shuh shuh u ong, “Lada kitei ki kynhun pyrshah shohdoh masi ki nud ban pyni bor ïa ki paidbah ka thain, ka HNLC kan ym ailad ïa ki Hindu ban rakhe ïa ka Puja tad haduh ba kin da weng noh ïa ka jingpyrshang jong ki ban pynkohnguh ïa ka Jaidbynriew jongngi, ba ki mrad ki kham kor ban ïa ki briew.”
Utei u nongïalam ka HNLC u la ong ruh ba ka jingpyrshah kaba katei ka kynhun ïada masi ka kynduh halor ka jingpyrshang jong ki ban pynlong ïa ka rally ha ka thain shatei lam-mihngi jong ka Ri ka la pyni ïa ka jingkhihwin kaba jur ha ka imlang sahlang.
“Ka HNLC ka kyntu ïa kiwei ki ri kum ka America, China, Pakistan bad kiwei pat ba kin tuklar lang ha India shwa ba kane kan poi sha u pud ba ka jingsynshar kan dei da ki nongïalam niam ha ka kyrteng u Blei.
U la kdew ruh ba kitei ki rally ba kitei ki kynhun ki thmu ban pynlong ka la wanrah ka jingsngewkhia khamtam halor ka jingmih ki jingjïa shah thombor kito ki briew kiba ju khaii bad shohdoh masi.
“Ka jingtieng ba ha Meghalaya ka lah ban mad lang ïa ki jingjia shah thombor kumba la jia ha Uttar Pradesh bad Haryana ka pyni ïa ka jingdonkam ban tuklar kyrkieh ïa kane ka ishu..”