Ki paid Garo ki donkam ïa ka lynti rel, wat la ki Ri Lum Khasi Jaiñtia kim kwah: Marcuise Marak

Shillong, Nailar 04: U nongïalam ka National People’s Party (NPP) bad Myntri Sorkar Marcuise N Marak ula ong ba lada ha Ri-lum Khasi Jaiñtia kam kwah ban wanrah ïa ka lynti rel, ka Ri-lum Garo khlem pep kan dawa bad ka donkam ïa ka jingwan pynpoi lynti rel ha kane ka thaiñ.
“Lada ka Ri Khasi bad Jaiñtia kim treh ïa ka lynti rel, khlem pep, ngi te ngin dawa (ha ri-lum Garo) namar ngi donkam ban pynpoi ïa ka lynti rel sha kiwei kiwei ki jaka na Mendipathar,” ong u Marak haba ïakren bad ki nongthoh khubor ha ka sngi Nyngkong.
Une u MLA ka Williamnagar ula ong ba u MLA ka Siju-Ronggara Rakkam A Sangma ula dep ban dawa ban pynpoi lynti rel haduh Baghmara bad ka la don ruh ka jingdawa ban pynpoi sha West Garo Hills.
Ula ban jur ba ka jingpynpoi ïa ka lynti rel na Mendipathar sha kiwei pat ki jaka kan ai jingmyntoi shi katdei eh ïa ka thaiñ, khamtam da ka jingpyndep ïa ka jingkieng halor ka Wah Brahmaputra ka ban pynïasoh na Phulbari sha Dhubri.
“Nga kwah eh ban pan ïa ka lynti rel haduh East Garo Hills hynrei kaba biang eh ka dei ban pynpoi sha South West Garo Hills namar ki don shibun ki kam rep ha ka thaiñ bad lada pynïasoh bad hadien ba dep ka jingkieng halor ka Wah Brahmaputra ba pynïasoh na Phulbari sha Dhubri, kan sa dei ka jaka khaïi pateng kaba heh ha West Garo Hills” ong u Marak.
Ka jingtyrwa ban pynpoi lynti rel ym tang ba kan pynkhlaiñ ïa ki lad pynïasoh hynrei kan kyntiew ruh ïa ki kam khaïi pateng ha West Garo Hills.
Haba kylli la un phah ïa ka jingtyrwa sha ka Sorkar, u Marak ula pynpaw ïa ka jingsngewhun namar ba ka lynti rel ban pynïasoh haduh Baghmara kan ïaid lyngba ka Williamnagar, ka ban ai jingmyntoi bha ïa ka thaiñ.
“Kane kala biang palat ïa nga namar lada pynpoi ïa ka lynti rel haduh Baghmara, khlem pep kan ïaid lyngba ka Williamnagar,” ula bynrap.