Ki Ophisar ki la leh ïa kaba donkam, ong u Myntri halor ka jingshlei um ka skul bad ki ïing briew

Shillong, Jymmang 21 : U Myntri ba dei peit ïa ka tnad Revenue and Disaster Management jong ka sorkar Jylla, Bah Kyrmen Shylla ha ka sngi Balang u la ong ba ki ophisar ki la leh ïa kaba donkam halor ka jingjïa shlei um ka skul bad bun tylli ki iing briew ha ka sngi Ba-ar ha Umpher, Byrnihat.
Haba kren bad ki lad pathai khubor, u Myntri u la ong, “Haba ïadei bad kane ka jingjia ngam pat ïoh pdiang satia ïa ka kaiphod kaba bniah tangba lehse ki ophisar ka tnad ki la leh ïa kaba donkam kumba ki ju leh na ka por sha ka por ban peit ba kan ym don kano kano ka jingjia ba sngewsih ïa ki paidbah.”
Lah ban kdew hangne ba na ka daw ka jingther khlem sangeh jong u lapbah, ka shnong Umpher kaba don ha ki bynta jong ka Byrnihat ka la mad ïa ka jingshlei um kaba jur bha haduh ba ki la don ki skul bad ki iing briew kiba la mad ïa ka jingshlei um nalor ba ka la tap ruh ïa ki lynti ïaid.
Ha kane ka jingjia, ka skul St. Jude Higher Secondary School, Byrnihat,ka la hap ban ai shuti noh ïa ki khynnah skul hadien ba ka um ka la rung sha ki kamra klas bad sha ki phyllaw jong ka skul. Nalor kata ki don ruh ki ïing ki sem ruh kiba la shah ktah jur nalor ba ka la pynjulor ruh ïa ki jingdon jingem.
Tang shu poi ka aiom slap, katei ka shnong ka ju shah ktah na por sha ka por na ka jingshlei um, ha kaba ka daw la kynnoh ba ka dei ka jingbym biang ka nala um jong ka surokbah National Highway-6 ha Ri Bhoi.
Halor kane, kiba bun ki nongshong shnong ki la pynpaw ïa ka jingsngewkhia halor kane ka jingïakynduh jingeh na ka por sha ka por tang shu dei ka por slap. Ki la kyntu ruh ïa ki bor ba dei peit ba kin tuklar bad thaw lem ki lad ki lynti khnang ba ki paidbah ki lait na kum kitei ki jingjia.