Ki nongrep ki pyndap ïa ka bam ka dih, hynrei ki shah khñiot beiñ man ka por

Nongpoh, Nohprah 04: Kum ka jingkynmaw burom ïa ka jingtrei shitom jong ki nongrep, ka kynhun ki Nongrep hapoh ka shatri jong ka Hill Farmers Union ka la rakhe ïa ka Farmers Day naka bynta ki nongrep jong ka dong Umden. Ïa kane ka prokram la pynlong ha Umden Nongtluh Parish Hall, Umden.
Ha kane ka sngi kyrpang, la wan ban ïa shimbynta da u MLA ka Nongpoh, Bah Mayralborn Syiem kum u kongsan, ha ryngkat u Bah Eric Kevin Dkhar, BDO ka Umling Block kum u symbud kongsan. La ïa don lang ruh u Pranjal Dutta, District Horticulture Officer ka Ri-Bhoi, ka Kong Serolyne Chyne, District Agriculture Officer ka Ri-Bhoi, u Bah Alfonbirth Kharsyntiew, General Secretary ka Hills Farmers Union Sengkmie, u Bah Ronald Khongjoh, President ka HFU Ri-Bhoi lem bad kiwei kiwei ki nongïalam ka seng.
Haba kren ha katei ka jingïalang, u MLA, Bah Mayralborn Syiem, u la ong ba ka sngi jong ki nongrep ka dei ka sngi kaba kyrpang ban kynmaw burom ïa ka jingtrei shitom jong ki nongrep kiba pynioh jingbam jingdih man ka sngi.
U la ong ruh ba ka Ri ka dap da ka dud bad ka ngap, kaba la ai kyrpang da U Blei, hynrei namar ka jingleh bym suitniew jong ki briew, ka jingsboh jong ka khyndew ka la sdang duh. Kum u nongmihkhmat u la ong ba u iohi ïa ki jingeh ba ki nongrep ki ïa kynduh ha kiba bun ki liang, ka jingshah pynjot ki jingthung jingtep, ka jingeh ha ki iew ki hat, ka jingshah khñiot dor ki mar rep bad kiwei ki jingeh.
U la kular ba kum u MLA un sa rah ïa kine ki mat ha ka iing dorbar thaw aiñ ban ïakren bad wad ki lad ki kabu ban pynbeit ïa ki jingeh kiba ki nongrep ki ju ïa kynduh man la ka por.
Ha kane ka sngi naka liang ka HFU kala sam ruh da ki symbai jhur sha ki nongrep ka thaiñ Umden.