Nongpoh, Nailar 22: Kum kawei na ka jingthmu ban ïa don bynta lang na ka bynta ban dang kyntiew ïa ka pule ka puthi bad ban dang ai mynsiem ïa ki samla pule ba kin kiew shaphrang ha ka liang ka pule ka puthi, ka kynhun ki khynnah skul barim ka St. Michael’s Higher Secondary School ha ka 19 tarik u Nailar 2022 ki la lah ban jied thymmai ïa ki nongïalam ba thymmai jong ka kynhun ki khynnah skul barim katei ka skul kaba don ha Umsning.
Ïa kine ki nongïalam ba thymmai ka kynhun ki khynnah skul barim ka St. Michael’s Higher Secondary School, Umsning la jied ha ka jingïalang kaba la long ha Hall jong katei ka skul, ha kaba ïa kane ka jingïalang la pynïaid da ka Kong Cornelia Mawthoh, kaba dei ka President barim ka kynhun ki khynnah skul barim ka St. Michael’s Higher Secondary School, Umsning.
Kitei ki nongïalam ka kynhun ki khynnah skul barim ka St. Michael’s Higher Secondary School, Umsning ki kynthup ïa u President ba la jied ïa u Bah Nicky A. Kharthangmaw, Vice president, Staining S. Nongbri, General Secretary, Donkupar J.B Wriang, Assistant General Secretary, Kong Clarisa Ryntathiang, Publicity Secretary, Balumlang Nongbri, Finance Secretary, Phrangsngi Kylla, Education Secretary, Sylvester Mawthoh bad la jied ruh kum ki nongai buit (Adviser) ïa ka Kong Mariana Dkhar bad ka Kong Cornelia Mawhtoh.
Kumba la pynpaw da kitei ki nongïalam ka kynhun ki khynnah skul barim (Past Pupils), ka jingthmu ba ki la ïalum ïalang bad ban don da kita ki nongïalam ha kane ka kynhun ka dei shi bynta ban don kata ka mynsiem ban dang kyntiew ïa kane ka skul ba kan dang ïaid shaphrang ha kaba ai jingnang jingstad ïa ki khynnah skul kiba pule ha katei ka skul bad ruh ban don kata ka jingïatrei lang na baroh ki liang.
