Ki nonghikai ki nongsaiñdur ïa ka longrynïeng jong ki khynnah skul ha ki jaka pule: Renik

Mawkyrwat, Nailur 05: Ha ryngkat ka Ri India baroh kawei, ïa ka sngi burom ki nonghikai jong mynta u snem ne ka “Teacher’s Day 2022”, ka ophis jong ka District School Education Officer, South West Khasi Hills District, Mawkyrwat ka la ïoh ban pynlong ïa ka prokram ba kyrpang hapoh jong ka Multipurpose Hall, Deputy Commissioner’s ophis, Mawkyrwat ha kaba u bah Renikton Lyngdoh Tongkhar, Nongmihkhmat ka Mawkyrwat Constituency bad Myntri jong ka sorkar Jylla u la long u kongsan.
Haba kren ha ka jingïalang ha kane ka sngi, u bah Tongkhar u la pynpaw ïa ka jingsngewnguh ïa ki nonghikai kiba la trei shitom met bad mynsiem na ka bynta ban ai ka jingnang jingstad bad ban saiñdur ïa ka longrynïeng jong ki khynnah skul bad ha kajuh ka por kiba la ai mynsiem ba kin nang kiew ha ki liang baroh la ka long ha jinglong jingim babha bad ki jingaimynsiem ba kin nangïaid ha ka lynti kaba dei bad ka jingjop ha ka jingim jong ki kaba manla ka sngi.
Haba pynpaw halor ka jingsngewnguh ïa la ki jong ki nonghikai ba dei lyngba ka jingtrei shitom jong ki ba u la lah ban poi haduh kane ka kyrdan kaba u bat mynta bad da kaba pyni ba ka kyntien ‘TEACHER’ ne ‘Nonghikai’ ka long kawei ka kyntien kaba la kit jingmut haduh katta katta bad ba ki briew kin ieid, burom bad kheiñkor namar u synñiang uba ki ki la noh ha ka imlang ka sahlang.
Ka kong C. Kharkongngor, IAS, Deputy Commissioner, South West Khasi Hills District ka la ong ba ïa kane ka sngi la rakhe kum ka dak ban burom ïa ka sngi kha jong u Dr. Servepalle Radhakrishnan, President barim jong ka Ri India. Ka la ban ruh ba ki nonghikai ki long ki nonglam lynti naduh ba ki khynnah skul ki dang rung nyngkong ha ki jaka pule haduh ba kin da mih na skul ne jaka pule. Ka la ong ruh ba ki nonghikai ki dei ki nongsaiñ dur bad kiba pynshlur bad ai mynsiem kumno ba kin leh ïa kaba dei bad kaba bha tam ha ka jingim ka jong ki da kaba bynrap ba ka lawei jong ka ri ka shong hi ki khynnah bad dei ki nonghikai kiba long ki nongprat lynti ban long ki nongïalam jong ka lawei.
Namarkata, ka la ong ruh ba ki nonghikai ki don ka kamram kaba kongsan tam ha ka ban pynlah ïa ki briew ban long kiba jop, la ka dei ha ka-kam ka-jam lane ha ki kam la jong. “Ki ïarap ruh ïa ngi ba ngin im ka jingim kaba bha”, ka la ong bad namarkata, ïa kane ka sngi la rakhe ban ithuh ïa ki jingeh ba ki mad, ka jingtrei shitom, bad ha ka ban tei ïa ka long briew man briew.
Lah ruh ban kdew ba ka kong Bioles Lyngdoh, P.U. Arts, Assistant Teacher Mawthawpdah (Def) U.P. School, Mawthawpdah ka la ïoh ïa ka State Award 2022. Katba ha ka District Awards 2022 pat ki nongïoh bynta ki long u bah Handurass Shullai, M.A, BEd, Vice Principal Pongkung Church jong ka God Higher Secondary School, Pongkung ha ka Secondary Level, ka kong Driallinis Shangdiar, B.A, Assistant Teacher jong ka Nonglang Upper Primary School ha ka Upper Primary Level bad u Readverb R. Marak, HSLC, Assistant Teacher jong ka Ranikor Government L.P. School ha ka Lower Primary Level.
Nangta shuh shuh la ïoh ruh ban ai ïa ka khusnam Best Scout Master ha u bah Francis Thyrniang, Assistant Teacher jong ka St. Mary’s Higher Secondary School, Rangblang katba ïa ka Best Guide Captain la ai sha ka kong Shantihun Kharsyntiew, Assistant Teacher jong ka Flower Bud Upper Primary School, Mawranglang.
Kiwei pat ki nongkren ki long u bah D. Nongsiej, SDSEO, South West Khasi Hills District uba la ai ka jingkren pdiang sngewbha, u bah Handurass Shullai, M.A, BEd, Vice Principal Pongkung Church jong ka God Higher Secondary School, Pongkung uba la ïoh pdiang ïa ka khusnam. Shuh shuh la pynshit pynshngaiñ ïa kane ka sngi da ka jingrwai na ki khynnah skul jong ka Jingïaseng Kynthei Mawkyrwat Presbytery Higher Secondary School bad ka jingshad na ki khynnah skul jong ka Maharam Government Higher Secondary School, Mawkyrwat bad ka National Anthem ba la lamkhmat da ki khynnah jong ka Nativity Scout & Guide Unit.
Ïa ka jingïalang la pynïaid da ka kong S. Kharsahnoh, DSEO, South West Khasi Hills District bad ka jingkren khublei na u bah S. Kharbteng, S.I. South West Khasi Hills District.