Ki nonghikai ki long ka jingkyrmen ban tehlakam ïa ka jingsniew jong u drok : Abhilash Banarwal

Khliehriat, Jylliew 08 : Ka ophis jong u Deputy Commissioner ka East Jaiñtia Hills District, mynta ka sngi ka la pynlong ïa ka jingai jinghikai bad ka workshop kaba kyrpang ha conference hall ha ophis jong u Deputy Commissioner ha kaba la wan ban ïa shim bynta da ki nonghikai bad ki khynnah skul na ki skul bapher bapher kiba don hapoh ka district, kane ka prokram ka long halor ka phang ban teh lakam bad rat diengkhong ïa ka jingpyndonkam drok hapoh ka district.
U Deputy Commissioner ka East Jaiñtia Hills District, u la ong ba u don ka jingkyrmen bad kyrmen ruh ba ki nonghikai ki don ka lad kaba paka ban tehlakam ïa u drok namar dei ki nonghikai kiba iohi kham bha ïa ka jinglong jingman jong u ne ka khynnah ha skul namar ki khynnah ki pynlut bun ka por hapoh skul, kumta kane ka prokram ka long ban buh (engage) ïa ki nonghikai ha ka thup ban tehlakam ïa u drok
“Ki nonghikai ki dei ka jingkyrmen kaba biang bha (best hope) bad ki don ka bynta ruh ban kyrshan lem ïa ka imlang ka sahlang bad ki bat ïa ka kam ruh ka ba donburom ha ka imlang ka sahlang, ki lah ban bishar kham bniah ïa ka jinglong jingman jong ki khynnah bad ban sngewthuh ruh ïa ki khynnah lyngba ki dak ki shin, ki jingleh bad jinglong ki khynnah hapoh skul la u ne ka khynnah ki dei kiba la ngop ha u drok bad ba ki dei ban tuklar lem halor kane ha shwa ba u ne ka khynnah ki poi shaduh u pud ban kyrnih ha ka jingdih drok bad da ka jingtuklar jong ki nonghikai suki pa suki na ka por sha ka por ki khynnah kin lah beit ban lait na ka jingdih drok bad ka jingshah peit ibeiñ ha ka imlang ka sahlang.
Ki mat kiba la thir ha kane ka Workshop ki kynthup ruh bad ki aiñ kiba don ha ka thup jong ka NDPS, ka jingai jingiasyllok, ki jait drok bapher bapher, ka jingbishar bniah ïa ka jingpher ha ka met ka phad, ka jingshah ktah ka imlang ka sahlang, ka jingshah ktah ha ki longiing longsem kiba na ka daw ka jingdih drok bad kiba la wan ban ai jingpynshai halor kitei ki mat ki kynthup, u Addl. Superintendent of Police, East Jaiñtia Hills District, u B.Jyrwa, MPS, u District Child Protection Officer, East Jaiñtia Hills District, u bah T.Kyndiah, Programme Manager MCSWA, ka kong R.Patlong bad u Medical Officer Incharge jong ka OST Khliehriat, u Dr J.Nongtdu.