Mairang. Nailur 16: U Babu FC Shullai, General Secretary jong ka All Primary School Teachers Association (APSTA) u la ong ba ki Nonghikai ki don ka bor ban wanrah ka jingkylla bad ki lah ruh ban pynjop ne pynrem elekshon ïano ïano.
“Wat lada ka sorkar kam shah ïa ngi ba ngin mih ban ïalap elekshon, hynrei ngin trei napoh napoh”, u la ong.
Ïa kane u la ong haba kren ha ka jingïalang kynmaw burom ïa ka lyngkhuh sngi ïap mba 173 snem u Thomas Jones bad ka jingkynmaw ruh ïa ka jingdap 180 snem ka jingsdang ki Lower Primary Schools ha ri Khasi, kaba la pynlong da ka APSTA ha Madan Mot Tirot ha Mairang.
U nongïalam ki nonghikai skul Primary, u la pynpaw ka jingsngewkhia ba ka map jong ka jylla ka la nang rit nang rit na kaei kaba u ju dro ha ka por ba u shong Class IV ne Class V. “Lada ngi kum ki Nonghikai ngim leh eiei, ka map kan nang rit nang rit”, u la ong.
Kum u briew uba ju trei ruh ha ka imlang sahlang, u Bah Shullai, u la ong ba ka dei ban don ka jingkylla ha ka jylla lym kumta ka imlang sahlang kan mad bun ki jingeh.
Ha kaba ïadei bad ki jingtrei ba bun ki nonghikai, u la ïathuh ba kumno naduh u snem 2010, ma u bad ka APSTA ki la ïarap ïa ki nonghikai kiba la shah weng kam na ka jingtah sia lieh ba kin ïoh biang ïa ka kam da kaba ïakhun da ka mumotduma haduh Supreme Court ruh.
U Bah Vincent Pala, MP ka Shillong, u la long u Kongsan ha kane ka jingïalang. Ha ka jingkren jong u, u la ong ba ki nonghikai Primary kidei ki nonghikai kiba baroh baroh ki kynmaw lut. “Nga ïa ki nonghikai College, University ngam da kynmaw, hynrei ïa ki nonghikai LP te nga kynmaw beit”, u la ong.
U la ong ba ki nonghikai kidei ka kynhun kaba trei ym tang na ka bynta ka tulop, hynrei ki trei naduh ka mynsiem ban ai jingnang jingstad bad ban pynrung ha ki khynnah ïa ka nongrim kaba biang naduh ba ki dang rit. U la ai nuksa ïa ka jinghikai U Jisu, ka Mother Teresa kiba la hikai ei khlem tyngkai ha ka jingim jong ki.
Ha kane ka jingïalang la don lang ruh u DC Eastern West Khasi Hills, Bah W. Nongsiej, u Pa’iem P. Manik Syiemlieh, Syiem ka Hima Nongkhlaw bad kiwei kiwei de ki ophisar sorkar bad kumjuh ruh nongïalam Shnong.
La sam ruh ïa ki jingïarap sha ka Ri Khasi Channel na ka bynta ka Christmas Makeover, nangta sha ka Skul Mairang Vidyajyoti Inclusive Secondary School bad ka Holy Cross Hospital Mairang.
