Ki mukotduma hapdeng ki riewlum yn sa lah ban bteng biang ha District Council Court: PN Syiem

Shillong,Nohprah 05 : U Deputy CEM ka Khasi Hills Autonomous District Council (KHADC) Bah Pynshngaiñ N Syiem ha ka sngi Palei u la ong ba ka jingpynmih rai jong ka Supreme Court da ka Stay Order ha ka 02tarik u Nohprah, 2024 sa shisien pat ka la ai jingkyrmen biang ïa ki District Council Court.
Haba kren bad ki lad pathai khubor, u Bah Pynshngaiñ u la ïathuh ba mynta ki district council court ki la lah ban bteng biang ban shim kam ïa ki mukotduma hapdeng ki para riewlum katkum ka para 4 bad para 5 jong ka Khyrnit kaba Hynriew.
“Ngi sngewtynnad ba ka Supreme Court ka la shimkhia ïa kane ka bynta bad kumjuh ïa ki nongïasaid jongngi ki la trei shitom wat ban sah katto katne sngi ha Delhi ban ïa syllok bad u Nongïasaid jongngi ha Supreme Court. Da ka jingshimkhia jong ki, ha ka 02tarik mynta u bnai ngi la ïoh ïa ka rai. Kam mut ban Stay lut ïa ka Order baroh kawei, tang ïa ka Paragraph ba 34 bad 38 jong ka Order,” u la ong haba kren bad ki lad pathai khubor.
Shwa kane, u Deputy CEM u la ïathuh ruh ba naduh u snem 2023 ym don shuh ki mukotduma ha ki district council court
U la ïathuh ruh ba kane ka jingjïa ka la pynnoh mynsiem bha ïa ki magistrate namar ka jingshim kam ka la duna bha. U ong ruh ba ka la don ka jingsyier ha kato ka por ba ka lah wat ban poi haduh u pud ba hap ban khang khyrdep noh ïa ki Kashari jong ka District Council.
“Kiba bun ki magistrate jongngi ki la noh mynsiem bad kumta kane ka rai ka la long ka dawbah ban ai mynsiem ïangi ba ka ‘bishar’kadei ban long ka jongngi,” u la bynrap biang.
Kumta, u la ong ba kane ka rai jong ka Supreme Court sa shisien pat ka la ai mynsiem biang bad ka pynpaw ruh ba ka Iing Bishar ba ha khlieh duh ha ka Ri ka burom ïa ka bor bishar jong ki kashari jong ka District Council.