Ki MLA kim dei ban shu ïohi tang na shynrong ïa ka jingpynthame kiwei ïa ka lynti Rel: KSU

Shillong, Risaw 07: Ka Khasi Students Union (KSU) ka la kyntu ïa ki nongmihkhmat na rilum Khasi bad Jaiñtia ba kim dei ban shu ïohi tang na shynrong ïa ka jingpynthame jong kiwei ki ar halor ka lynti Rel.
“Ka KSU lyngba kane ka kyrwoh ka kyntu sha baroh ki nongmihkhmat ka Bri u Hynñiewtrep ba kim dei ban shu ïohi tang na shynrong lyngba ka jingpynthame kiwei ki ar halor ka lynti rel. Ka seng ka sngew ba kum ki nongmih khmat ki dei ban peit bniah ban ïohi shynna ïa ki jingma kiba bun jait kiba ap na ka jingwan ka lynti Rel ha ka Bri u Hynñiewtrep bad kaba kongsan eh ka dei ka jingwan buhai shnong kiba nabar hapoh ka Bri u Hynñiewtrep,” ong u kyrwoh na ka KSU ba la phah da u General Secretary u samla Donald V. Thabah.
“Lada wan ka lynti kaba ki ong ban kit tang ka marbam, kam eh hadien ban poi suk ka rel kit briew namar la don lypa ka lynti ïaid. Ban pynskhem ïa kane ngin hap phai shadien ha ki por u Pa’iem Tirot Sing ba kumno lyngba ka surok ka East India Company ka synshar da ka bor ïa ka Ri Khasi,” la bynrap ka seng.
“Ngi hap ban sngewthuh shai ba ka jylla Meghalaya ka dang duna shibun ki aiñ ban khanglad ïa ka jingrung laitlan ki briew kiba nabar bad kumjuh ruh ban pynneh la ka dustur ka riti bad ban long trai ha ka khaii ka pateng ha ka khyndew ka shyiap,” la pynpaw ka seng.
Haba buh jingkylli ïa ki MLA ka KSU ka la ong, “lyngba kane ka kyrwoh ka (seng) ka kwah ban buh jingkylli ruh ba balei duna palat ki nongmihkhmat na ka jaidbynriew ki ban ïa khun tyngeh na ka bynta ka ILP lane wat tang ban kren halor ka ILP lada dei ha ki rynsan Sorkar bapher bapher lane ha ki lad pathai khubor. Ka KSU ka kwah jingpynshai ruh hato la don mano mano ki MLA kiba ju leit ban dawa ïa ka ILP na ka Sorkar Pdeng ha Delhi? Shuh shuh katno tylli ki jingthoh lane ki resolution ka Sorkar Jylla ka la phah sha ka Sorkar Pdeng halor ka jingkwah ILP ki paid nongshong shnong ka jylla? Hato ki MLA kim dei ban thrang ILP palat ban ïa kaba thrang lynti rel?” la buh jingkylli ka K
“Ka KSU ka pynbna ba ka seng hi kan ïakhun dohïap pyrshah ïa ka lynti rel katba ka jaidbynriew hi kam pat lah ban shong shngaiñ ha la ka jong ka Ri. Ha kajuh ka por ka kyntu ïa ki paradoh parasnam ba kin ym shah pynthame halor ka lynti rel hynrei ban pyrkhat shwa ïa ka lawei ka jaidbynriew khlem da ïa peiñ bad ka myntoi shimet,” la bynrap u kyrwoh.