Shillong, Lber 22 : U President jong ka HSPDP, Bah KP Pangniang ha ka sngi Ba-ar u la kob ba baroh arngut ki MLA jong ka party da lei lei ruh kin ym shah pynbiej ne shah ngop ban leit ïasoh noh bad ka party NPP.
Katei ka jingkob jong u President kadei halor ka jingkylli ba haduh katno ka party ka sngewskhem ba ki arngut ki MLA jong ka ba kynthup ïa u MLA ka Sohiong bad MLA ka Mawkyrwat, kin aireng biang na ka tiket jong ka party ha u snem 2023.
“Ngim don jingma satia watla bun ki khubor hamsaïa ki ong ba kin don ki MLA jong ka HSPDP kin leit ban ïasoh noh sha kiwei pat ki seng saiñpyrthei. Hynrei kane kan ym jia satia ha ka party jongngi,” la ong u Bah KP Pangniang.
Nalorkata, u ong ruh ba kane ka elekshon MLA ha u 2023 kadei ka jingsdang ba ka HSPDP kan ïoh ban jop kham bun shuh shuh ka jingdon ki MLA.
Shuh shuh haba jubab halor ka jingkylli, u President ka party u la ong ruh ba ka jingsngewskhem jong ki kadei namar haduh mynta dei tang ka party HSPDP kaba dang bat ïa ka jingtreikam kaba beit bad kaba ryntih bad dei na katei ka daw ki kyrmen ba kan ym don satia kano kano ka jingma.
Lah ban kdew hangne, ba kitei ki arngut ki MLA jong ka HSPDP ki kynthup ïa u Bah Renik Lyngdoh Tongkhar, MLA ka Mawkyrwat ba dei ruh u Myntri ka tnad PHE bad kumjuh u MLA ka Sohiong, Bah Samlin Malngiang. Kitei baroh arngut ki la donlang ruh ha katei ka jingïalang jong ka CEC jong ka party ha katei ka sngi.
Kumba long haduh mynta hi, ka HSPDP ka don tang arngut ki MLA bad arngut ki MDC ha KHADC.
