Shillong, Naitung 05 : Ka Hill State People’s Democratic Party (HSPDP) ha ka sngi Ba-ar ka la rai ban kyrshan ïa ka kyrtong ba pynieng da ka National Democratic Alliance (NDA) hapoh ka jingïalam jong ka BJP, ka Draupadi Murmu na ka bynta ka elekshon President kaban long ha ka 18tarik Naitung.
Ka jingshim jong ka party ïa katei ka rai kadei hadien ba ki la ïoh pdiang ïa ka jingkyrpad na u Incharge ka Presidential Election, Meghalaya ba dei ruh u National Executive Member ka BJP, Bah AL Hek.
Haba kren bad ki lad pathai khubor hadien ka jingïalang jong ka CEC, u President ka party, Bah KP Pangniang u la ong ba na ka liang u Bah AL Hek u la kyrpad ïa ka party ba kan kyrshan lang ïa ka kyrtong jong ka NDA ha kane ka elekshon.
“Hadien ka jingïatai kaba sani bha ngi la rai ban pdiang ïa ka jingkyrpad jong u ban kyrshan ïa ka kyrtong ka NDA kaba dei ruh ka longkmie riewlum,” ong u President ka party.
Shuh shuh u la ong ruh ba na ka party ka kyntu ruh ïa ki arngut ki MLA jong ka, kata u Bah Renikton L Tongkhar, MLA ka Mawkyrwat kumjuh ïa u Bah Samlin Malngiang ba dei u MLA ka Sohiong.
Na ka liang u Bah Pangniang u la ïathuh ruh ba namar ka HSPDP ka donlang ha ka Regional Democratic Alliance bad ka UDP kin hap ban ïa kren lang ïa kane ruh ka ishu bad ki nongïalam jong katei ka party ruh.
Nalorkata, u ong ruh ka rai ba kin bteng jingkyrshan ïa ka kyrtong jong ka NDA ha ka elekshon President kadei namar ki la don bynta lypa ha ka sorkar MDA bad ki dang donkam ruh ban bteng ïatreilang namar ki don bun ki mat jong ka party kiba hap ban ïakren bad ka sorkar pdeng.
