Shillong, Nohprah 13 : Ki kynthei na Meghalaya ki long kiba hakhmat eh ha ka kam kaba ïadei bad ki mar jot bad ki long kum ka nuksa ha kaba wanrah ïa ka jingkylla kaba lah ban ïohi ha ka jingpynïakhlad ïa ki mar jot. Kawei na kum kine ki jingai mynsiem ka dei ka kynhun Self Help Group (SHG), kaba la ju khot paidbah kum ki “Merry Maiden jong ka Shillong” ka la kylla sha ka seng kaba pynïaid ïa ka jaka pynkhuid ïa ki mar jot.
Ka Merry Maiden ka la sdang nyngkong kum ka kynhun jong ki kynthei kiba lum ïa ki mar jot na ka jaka bret jaboh ha Marten. Ka kynhun mynta ka pynmih ïa ka sboh da kaba pyndonkam ïa ki buit tynrai, kaba pynkylla ïa ki jaboh jabaiñ sha ki jingdon jingem kiba kordor.
Ka jingjop jong ka SHG ka wan na ka jinghikai ba man ka por bad ka jingkyrshan teknikal na ka tnad Urban Affairs. Lyngba ka jingkyntiew ïa ka bor treikam bad ka jingkyrshan jong ki kynhun treikam, ki kynthei ki la pynkylla ïa ka kam kaba eh bad kaba ju shah khein bein sha ka kam kaba ryntih, kaba don burom bad kaba lah ban ïaineh. Ka kam jong ki ka long ban pynduna ïa ka jingbah khia ki jaka bret jaboh, ban pynbha ïa ka koit ka khiah jong ka khyndew, bad ban kyntiew ïa ka jingpynïakhlad ïa ki jaboh da kaba kitkhlieh ha ki shnong ba marjan.
Ha ryngkat ki jingmyntoi ïa ka mariang, ka kynhun ka la pynkhlain ïa ka ïoh ka kot kaba khuid ha ka thain, kaba pyni ïa ka bor ha ka imlang sahlang ban wanrah ki jingpynbeit na ka shnong ka thaw. Ki Merry Maiden of Shillong mynta ki long kum ka nuksa kaba khlain bha kumno ki jingpyrshang ba la ïalam da ki kynthei, haba la kyrshan da ki jingïarap jong ki jylla, ki lah ban ai ïa ki lad ki lynti kiba ïaineh ban pynbeit ïa ki jingeh ha kaba ïadei bad ka kam kaba ïadei bad ki jaboh katba ki dang kyntiew ïa ka roi ka par kaba kynthup lang ïa baroh bad kaba neh ha ka jylla Meghalaya.
Katkum ka jingpynshlur jong ka Sorkar Meghalaya ban pynkhlain ïa ki rukom pynbeit ïa ki jaboh, ka Jylla ka sakhi ïa ka jingkiew kaba ai mynsiem ha kylleng ki katto katne ki distrik. Ka jingkyntiew ïa ka jingpynïakhlad ïa ki jaboh, ki prokram pynlong sboh ba la ïalam da ki paidbah, bad ka jingpynkhlain ïa ka jingpeit bniah ïa ka mariang ki pynkylla dur thymmai ïa ki rukom pynkhuid ia ki jaboh ha ka thain. Napdeng ki jingmih kiba bha tam jong kane ka jingkylla ka long ka jingkiew jong ki sienjam ba la ïalam da ki kynthei ba la kyrshan da ki tnad sorkar.
Ka India ka sakhi ïa ka jingkylla ha ka rukom pyndonkam ïa ki jaboh, kaba la wanrah da ki sienjam hapoh ka tnad Housing & Urban Affairs, ka sorkar India, bad ki sienjam jong ki sorkar jylla bapher bapher. Da kaba pynleit jingmut ha ka jingpynïakhlad naduh ki tyllong, ka jingpynduna ïa ki plastic, ka jingpynmih sboh, bad ka jingïashim bynta jong ki paidbah, kine ki prokram ki pynkylla dur biang ïa ka rukom ba ki jaka sor ki pynbeit ïa ki jingeh kiba ïadei bad ka jingpynkhuid ïa ki jaboh bad ki mar jot. (PIB)
