Ki mat ba khluid ha Dorbar Mang Tyngka kin lah ban long ka jingjia ha Thangsko bad kaiphod bhah kam

Shillong, Rymphang 15: Ka Dorbar Mang tyngka jong u snem 2026-27 ka jylla Meghalaya kan sdang ha ka 16 tarik mynta u bnai bad katkum ka riti synshar ka ri ba ïa ka dorbar ba nyngkong jong u snem yn ai jingkren da u Lat ka jylla.
Katkum ki tyllong khubor kiba la ïohlum na ki katto katne ngut ki MLA, la sngewthuh ba kawei na ki mat jong ka jingïakren ka ban kham khluid, kan long halor ka jingïap jong ki nongbylla ha ka par dewiong ha Thangsko kaba la jia na ka jingbthei dynamite ha East Jaintia Hills District ha kaba 10 ngut ki la mynsaw.
La iathuh ruh ba kawei pat ka bynta kaba ki paidbah ki ap khmih lynti kaei kaba ka sorkar wanrah hapoh ka Ïing Dorbar ha kaba ïadei bad ka kaiphod kaba ai da ka Expert Committee sha ka sorkar, ha kaba u Myntri Rangbah ka jylla u Conrad K Sangma u la ong ba ka sorkar kan wanrah ha kane ka sien shong Dorbar Mang tyngka.
Ka jingkren jong u Lat ban sa kren hapoh ka Ïing Dorbar Thaw Aiñ ka jylla kan long ïa kaei kaba ka sorkar ka don ban leh na ka bynta ka jylla ha kane ka snem Mang Tyngka mynta u snem 2026-2027 ki ban long ka jingmyntoi bad ka bha ka miat jong ki nongshong shnong jong ka jylla baroh kawei.