Ki mar na ka thaiñ Shatei Lammihngi ki khring ïa ki nongbei tyngka nabar ri: G. Kishan Reddy

Delhi, Jymmang, 14: U Myntri Sorkar Pdeng ba dei khmih ïa ka tnat Development of North East Region, Tourism bad Culture, u G. Kishan Reddy u la ai jingkren ha ka ‘Round Table of Indian Foreign Service officers’, ba la pynlong da ka tnat External Affairs bad Invest India ka la don ka jingïashim bynta ki kynrem ki lyndan na ka Sorkar Pdeng, ki Diplomat bad ki nongbei tyngka ha ki kam bapher bapher ha kane ka jingïalang. U Myntri u la kren shaphang ki lad kiba don ïa ki nongbei tyngka ha ka thaiñ Shatei Lammihngi namar ka jinglong jingman kaba ïadei bad ka jingroi ha kane ka thaiñ. U la ong ruh ba ka jinglong jong ka shongsuk shongsain ka la kham bha, ki don ki lad pynïasoh kiba la kyntiew bad ka jingkut jingmut jong ka sorkar pdeng ban phaikhmat kyrpang sha kane ka thaiñ kaba la wanrah ïa ka juk jong ka roi ka par.
U Myntri u la ong ba ka Azadi Ka Amrit Mahotsav – NE Festival kaba la rakhe na ka 28 tarik u Ïaiong haduh ka 4 tarik u Jymmang ka la ïarap ban sdang ïa ka jingïakren halor ki kam ba kongsan ba ka la long kaba donkam bha na ka bynta kito kiba saindur ïa ki polisi bad ïa ki riew paidbah ruh. U la ong ruh ba ha kane ka jingïamir jingmut, la lap ba ki don ar tylli ki phang ha kane ka thaiñ – ka jingdonkam ban don shuh shuh ka rukom treikam Public Private Partnership bad ka jingshim ïa ki lad kiba don ha ka thaiñ kum ki kam jngoh kai, ki kam rep organic, ki kam rep, horticulture, floriculture, ki kam pynmih jain, kam shna tiar, ki kam IT, BPO bad ki kam ai jingshakri.
U la ong ruh ba ka don ka jingdawa ïa ki mar na ka thaiñ bad ruh ka jingktik ïa ki jingmut jong ki nongbei tyngka nabar ri hynrei ka don ruh ka jingduna ha ka jingtip bad ki jingngeit bakla kiba bun.
U la kyntu ruh ïa ki ophisar IFS ban pyndonkam ïa ka jingdon jong ki ha kylleng ka pyrthei ban kyntiew ïa ka jingong ‘Ka thaiñ Shatei Lammihngi ka dei ka paradise bym pat jngoh kai bha bad ka jaka kaba don ki lad kiba kyrhai’. U la kyntu ruh ïa ki ba kin long ki nongmihkhmat jong ki lad ha ka kolshor bad ki kam jngoh kai jong ka thaiñ shatei lammihngi.
U Myntri u la ban jur ruh ba ki ophisar IFS ki dei ban pynshlur ïa ki nongbei tyngka na kiwei kiwei ki ri ba kin phaikhmat sha ka thaiñ shatei lammihngi.
U la ong ba lyngba ka jingïatrei lang, ka India ka lah ban ïoh jingmyntoi bha ha kane ka Amrit Kaal, ban plie ïa ki lad kiba don ha ka thaiñ Shatei Lammihngi bad pynskhem ïa ka kum ka kor jong ka jingroi ka Atmanirbhar Bharat.
Kane ka prokram ba la pynlong da ka tnat External Affairs bad Invest India ka dei shi bynta jong ka prokram Mid-Career Training na ka bynta ki ophisar IFS kiba la long heh. Ka jingïamir jingmut ka la ktah katto katne ïa ki phang kiba ïadei bad ka jingkyntiew ïa ki jingbei tyngka bad kiwei kiwei ki sienjam jong ka sorkar ban kyntiew ïa ka nam jong ka India.