Ki lai tylli ki polling station ka thain Langpih ki dei ki mawnongrim ka jingïapynbeit pud

Nongstoiñ, Lber, 23: “Watla ka sorkar Assam bad ka sorkar Meghalaya kim pat lah ban pynthikna haduh lano kin sdang biang ïa pynbeit ïa u pud u sam ha ki jaka kiba hap ha ka Langpih sector. Hynrei ngin ym ailad ba ki lai tylli ki polling station, kata ka Nongsohram, Langpih bad ka Madanjaïaw, kin shah khynñiat sha ka Assam”, ong u bah K.P.Pangñiang MLA barim ka Rambrai Jyrngam constituency.
U bah Pangñiang haba ïakren bad u nongthoh khubor, u la pynkynmaw ba ka Langpih polling station ka dei kaba la ithuh bad mynjur da ka Election Commission jong ka ri India naduh u snem 1976, kata shisnem shuwa ba ka Election MLA bad MP kaba la long ha u snem 1977.
U la ong ruh ba hadien katto katne snem ki pulit Assam kim shah shuh ba ki paitbah ka thaiñ Langpih kin thep vote ha Langpih. Kumta ka sorkar Meghalaya ka la buh noh da ka temporary polling station ha ka shnong Mawsikar bad katei ka jaka thep vote, kam dei ha ïing skul ne ha kino kino ki ïing. Hynrei la shu shna da ki ïing trep da kaba shu ker malu mala, kaba lada peit la ithamula ban ym I dei satia ban ong ba ka dei ka jaka thep vote hynrei I kumba dei tang I jaka ba ïalehkai ki khynnah ap masi.
U la ong ruh ba ka jingisangsot ïa katei ka jaka thep vote ka la pynbitar, ha kaba u la kut jingmut triang ba un ïakhun katba don ki buit ki lad ban pynphai ïa katei ka polling station sha Langpih. Lada ki pulit Assam kin pynwit katno katno un ym ailad kam pher wat la kan poi ha uno uno u pud ruh.
Ha kajuh ka por u la ong ba kum u rangbah u la phai khmat kliaw sha ka Election Commission jong ka ri India bad u la rai ba un phah da ka jingthoh ban kyrpad ïa ka Election Commission ba kan phai khmat lem ban leh ei ei halor katei ka jingeh.
U bah Pangñiang u la ong ba hadien ba u la shah jied kum u MLA ha u snem 2018, u la leit sha nongbah Delhi ban ïakynduh ïa ki nongpynïaid jong ka Election Commission of India bad u la aiti da ka jingthoh ryngkat ki jingpynshisha, ba ka Langpih Polling station ka la don naduh u snem 1976 bad ki paitbah ki la ju thep vote ha katei ka polling station.
Hynrei hadien katto katne snem ki pulit Assam ki khanglad ïa ki paitbah ban leit thep vote bad wat ïa ki polling officer ba la thung da ka Election Commission ruh, kim shah satia ba kin wan ha katei ka polling station. Kumta na ka bynta ba ki paitbah kin ïoh ban pyndep ïa ka jingthep vote ban jied ïa ki nongmihkhmat ka State Election Committee jong ka jylla ka la bthah ïa ki paitbah ba kin leit thep vote ha Mawsikar.
U la ong ruh ba ka jingleit thep vote haduh Mawsikar ka la buh jingeh bha ïa ki paitbah namar ba naduh Mawdiangsnam, Umyiap, Miangbyrkong, Umwali, Langpih, Nongsohram, Nongma, Nongmawlong, Langpih Umtap, Madanjaïaw, Ïewnongma bad kiwei kiwei ki shnong, ki hap ban kiew shaduh Mawsikar da kaba ïaid kjat bun bun kynta, ka la pynshitom haduh katta katta khamtam ïa ki kynthei.
Kumta ka Election Commission of India ka la sngap bad shah skhor, ha kaba ka la pynmih da ka hukum ba dei ban pynphai biang ïa ka Langpih polling station ha kajuh ka jaka kumba ka la don naduh mynshuwa bad dei naduh ka 27 tarik Lber jong u snem 2018 ba ki paitbah jong ka shnong Langpih, Mawdiansnam, Umyiap bad kiwei kiwei ki la ïoh ban thep vote biang ha Langpih polling station.
Nalor kata u bah Pangñiang u la ong ruh ba lyngba katei ka jingthoh u la kyrpad ruh sha ka Election Commission, ba na ka bynta ka jingïaid beit ïaid ryntih jong ka Election bad ba ki paitbah kin ïoh ban pyndep ïa ka hok ban thep vote kum ki nongshong shnong ba pura jong ka ri India, u la kyrpad ba kan pynkha biang da kiwei pat ki polling station ba thymmai, khnang ba ki paitbah nong shong shnong kin kham suk ban leit thep vote. Na ka liang ka Election Commission ka la sngew dei bad ka la pynkha sa artylli ki polling station ba thymmai, kata ka Madanjaïaw bad ka Nongsohram polling station khnang ban pynsuk ïa ki nongshong shnong ban leit thep vote.
Ha kaba ïadei bad ka jingpynbeit ïa u pud u sam pat u bah Pangñiang u la ong ba um lah ban tip haduh lano kin sdang biang, kaba kumno bad naduh nangno namar kumba u Himanta Biswa Sarma Myntri Rangbah ka Assam u la pynsngew sha ki paitbah ha ka jingïalang kaba la long ha Langpih ha ka 16 tarik u bnai Naiwieng jong u snem 2022, ha ka jingïadon lang jong u Conrad Kongal Sangma Myntri Rangbah ka jylla Meghalaya ki Chairman jong baroh ar tylli ki Regional Committee on Border Dispute, ki paitbah Khasi bad Garo kiba shong ha ki shnong kiba hap hapoh ka Langpih sector ba ka jingïapynbeit ïa u pud u sam kan long beit, tangba kan ym long kumba ka Meghalaya ka khmih lynti, hynrei na baroh ki bynta kiba hap ha ki jaka kiba don jingïakajia ka Meghalaya kam dei ban khmih lynti ba kan ïoh lut.
U la ong ruh ba katei ka jingkren jong u Himata Biswa Sarma ka la long lypa ka sakhi kaba shai ba ka jingïapynbeit kan urlong. Haba kylli pat ba wat la ki paitbah kim shym la shah jied shuh ïa u kum u nongmihkhmat un dang shimkhia ne em ha kaba ïadei bad u pud u sam, u bah Pangñiang u la ong ba lada long nongmihkmat lane ym long nongmihkhmat ruh kam pher, namar u pud u sam jong ka jylla u dei ka kynroh kaba skhem jong ka jylla bad u pud u sam u dei ka dulir bad u sakhi uba skhem halor ka jinglong trai ïa ka khyndew ka shyiap, ki jaka ki puta bad ki jingdon jingem baroh.
Nalor kata u la ong ruh ba u pud u sam ba thikna jong kano kano ka jylla u long kum ka kynroh ba skhem kaba ïada na ka jingwan rung tuh jong kiba nabar bad lada ki wan rung jubor ruh ki trai jaka ki la don ka hok ban pynshitom bad wat ban beh krad ïa ki. Kumta na ka bynta ka jingmyntoi jong ki paitbah jong ki shnong khappud bad ka jylla baroh kawei, wat la um long shuh u nongmihkhmat hynrei un ym kynran dien ban dawa ba ka sorkar kan pyndep noh kloi ban pynbeit ïa u pud u sam ym tang ha West Khasi Hills hynrei ha baroh shilynter jong ka jylla kat ki jaka kiba dang don hapdeng ka jingïa kajia.
Utei u MLA barim ka Rambrai Jyrngam u la ai khublei kyrpang ïa ki nongpynïaid jong ka Election Commission of India, kaba la sngap bad shah skhor ïa ka jingkyrpad jong u bad kumba ka ECI ka la pynskhem biang ïa ka Langpih polling station bad ïa ki ar tylli ki ba la pynkha thymmai lada jia ba ka don kano kano ka jingthmu jong ki pulit Assam ban pynthut ne pynwit ïa kitei ki jaka un ym ailad satia.
Nalor kata u la ong ba lada ka jingïapynbeit ïa u pud u sam da ka sorkar Assam ban Meghalaya ka la sdang, ma u ryngkat ki nongsynshar shnong bad ki paitbah kin ieng skhem triang ban dawa ba ki shnong kiba hap ha kitei ki lai tylli ki polling station kim dei ban shah khynñiat sha Assam. Namar nalor kitei ki polling station ki don sa ki Lower Primary skul kum ka Mawdiangsnam, Langpih, Umtap Government L.P skul kiba la peit ban khmih da ka sorkar Meghalaya, kiba long ki sakhi bad ki jingpynshisha ba kitei ki jaka ki dang hap hapoh u pud u sam jong ka Meghalaya.