Ki lad pathai khubor na ri thor ki pyni ba ki isih naduh tynrai ïa ki nongshong shnong ka Meghalaya: Paul

Shillong, Jylliew 05: U Myntri ka sorkar jylla uba khmih ïa ka tnat ki Kam Jngohkai u Bah Paul Lyngdoh ha ka sngi Palei u la ong ba ka jingpynsaphriang khubor da ki lad pathai khubor na ri thor ne national media ka pyni ïa ka jingduna jong ki ban sngewthuh shaphang ka jylla Meghalaya bad kumjuh ruh ka pyni ïa ka jingisih kaba naduh tynrai ïa ka jylla bad ki nongshong shnong jong ka.
Haba pynrem jur ïa ki lad pathai khubor na ri thor halor ki jingpathai khubor ba bakla haba ïadei bad ka jingjia ïa ki arngut shi kurim ba na Indore, u Bah Lyngdoh u la ong ba ki lad pathai khubor na ri thor barabor ki don ka jingleh shilliang pyrshah ïa kane ka thaiñ shatei lammihngi bad ki ïohi ruh ba ka jingkiew ki kam jngohkai jong ka Meghalaya kum kaba don ka jingma.
“Namar kata ïa kane ka jinglong dei ban pynrem jur naba ka wanrah ïa ka jingtieng jingsyier,” bynrap u Bah Lyngdoh da kaba pynpaw ruh ba ka jingshah pynïap jong uwei u nongshong shnong ka Indore u (L) Raja Raghuvanshi ka dei ka jingjia kaba long marwei.
“Ha ka jingshisha ngim pat lah ban tip ïa kaei ka jingshisha kaba la jia tat haduh ba la pyndep pura ïa baroh ki jingtohkit, bad kam pat don ka kyntien kaba khatduh kaba lah ban ong halor kane ka jingjia. Namar kata nga pynrem jur ïa kane ka jinglong jong ki lad pathai khubor na ri thor. Kane ka pyni tang ïa ka jinglong leh shilliang jong ki pyrshah ïa kane ka thaiñ jong ngi bad kyrpang eh haba ïadei bad ka jingkiew ki kam jngohkai ha Meghalaya, naba ki ïohi ba ka dei ka jingma,” u la bynrap.
“Hynrei shah ïa nga ba ngan pynkynmaw ïa ki bad kumjuh ruh ïa ki nongshong shnong ka Meghalaya ba ka Sohra Cherrapunjee lah da ki phew phew snem jong ki kam jngohkai ka khlem pat khah snam ha ki jinglong jong ka. Kam pat don satia kano kano ka kaiphod halor ki kam umsnam ha ki por ba la leit bad ngi la don ruh ki missionary ba nyngkong ba kin wan poi ha Sohra ha u snem 1841, ngi don ka Ram Krishna Mission, kaba don ka jingtreikam kaba heh bha ha kane ka jylla, kaba la buh ïa ka headquarters jong ka ha Sohra. Kumta kane ka jinglong jong ki, ka pyni ïa ki jingduna jong ki ban sngewthuh shaphang ka Meghalaya bad kumjuh ruh ka jingisih naduh tynrai ïa ka jylla bad ki nongshong shnong jong ka,” bynrap shuh u Myntri Sorkar.
Ha kajuh ka por ka jingbteng ban wad ban pynlait im ïa ka tnga jong u Raja ba la khlad noh ka Sonam ka dang ïaibteng haduh mynta.