Shillong, Risaw, 10: Ki jingjia aksiden ba dang shen ha ka surok bah NH6 khamtam eh ka surok Shillong -Guwahati ka long ka mat kaba sngewkhia bha khamtam naka bynta ki nongleit nongwan kiba ju leit jingleit lyngba kane ka surok.
“Kine ngim dei shuh ban ong ki jingjia ba shu jia ryngkhat khamtam haba peit ha ki khyndiat sngi kiba la leit ki jingjia ba shyrkhei ki la jia ha kane ka surok bad nga sngew ba ym dei ban shu ong ba ki aksiden ki ju jia.
Ki daw ba kongsan jong kine ki jingjia ba shyrkhei kidei na ki jing pynher stet, ki khynnah bym pat dei ka rta ki lah da ïoh ïa ki licence, ka jinglong jong ka suin bneng ha ka Ri ka jongngi bad kaba kongsan eh kadei ka jingniah kali ha ka jingbuaid,” ong u Bah K Tariang uwei na ki Rangbah ba sngewkhia halor ka jingjia khah khah ki aksiden kali ha katei ka thaiñ
Shuh shuh u la ong ruh ba ha kine ki khyndiat sngi la ïohi ha ki lad pathai khubor ba ki pulit ki la pynlong ka jing talasi khamtam ïa ki kali rit bad ki kali ar shaka.
“Nga ai ka jingïaroh ïa ka jingtrei shitom ka jong ki. Ka pynlong ïa nga pat ban lyngoh ba balei kane ka jingleh kam treikam ïa ki truck ruh kumjuh namar la ju ïohi bunsien ba haba jia aksiden da ki kali heh ka jingjulor bad ka jingïap ka kham jur,” u la ong.
“Sa kawei kaba i thamula eh mynta kalong ba bun ki kali heh kim ïaid shuh sha ka liang ba dei ban ïaid bad u nong shim pass ym banse hap ban shim pass na sha ka ka liang ka bym dei. Kane ka buh jingma kaba khraw bha ïa ki nongleit nongwan. Da ym pat lah ban teh lakam ïa kine nga ngeit ba ngin dang ïai sakhi ïa shibun ki jingjia ïa tyngkhuh kali ha ki por kiban dang wan,” bynrap biang une u rangbah lyngba ka kyrwoh.
