Shillong Rymphang 18 : U kyrtong shimet na Mawlai, Bah Teibor Pathaw ha ka sngi Ba-ar u la ong ba ki don ki nongïalam party tang ban ïoh daw ïa u ha kane ka elekshon MDC ki la pyrshang sa ka wohdong bad wad daw ïa ka kam kaba u trei mynta la 20 snem.
Haba kren ha ka rynsan common platform ba pynlong da ka Mawlai Nonglum hynne ka step, u Bah Teibor u la ong, “Ba kim ïoh daw shuh ban kren ïa ki kam kiba nga trei kum u MDC ha kine ki 6 snem mynta ki sdang ban wad daw sa ïa ka kam kaba nga la trei bad ïarap ïa ki paidbah mynta la 20 snem. Hynrei da ka jingkyrkhu jong u Blei, ki 20 snem ba nga shakri bad da ka jingduwai jong ki hajar tylli ki longiing kiba ïoh jingmyntoi, ka kam jongnga ka la nang skhem shuh shuh.”
Nangta u la ong ruh ba u da lyngoh ban ïohsngew ba kat u nongïalam ba rangbah jong ka party u dang wad daw bad wohdong ia ka kam kaba u trei ka bym don bynta ei ei satia bad ka elekshon.
Haba pynshai pat halor ka jingïai mih ki jingkynnoh ba um pat resain satia na ka NPP, u Bah Teibor u la ong, “Sngewbha phah ïa ka Address jongphi bad ngan sa phah ïa kine ki shithi kiba nga la resaiñ kum u MDC jong ka NPP.”
Ha kawei pat ka liang, u la kyntu ïa kito ki nongïalam jong ka party ba ki dei ban pynshisha ba u donkti bad don bynta ban lilam ïa ki jaka ha khappud da kaba soi ïa ka MOU kumba ki kynnoh.
“Lada phi lah shisha ban pynshisha ba nga lilam ïa ki jaka ha khappud nga kloi ban shongthait noh naka kam sainpyrthei,” u la ong.
U Bah Teibor u la ong ruh ba katba kiwei ki party ki nang bein katta ka nang ai bor ïa u ban trei kham bha shuh shuh na ka bynta ka constituency kaba u la aiti met bad mynsiem ban ai ka jingshakri kaba bha tam.
Ha kane ka sngi la ïoh ruh ka jingpynshai na kiwei pat ki kyrtong kynthup ïa u Bah PT Sawkmie MLA barim uba ïakhun kum u kyrtong shimet, nangta u Bah Wanseng Jyrwa na ka Congress, Kong Daniella na ka BJP bad u Bah Seibor kum u kyrtong shimet.
