Ki la don bun ki jaka ba la aiti da ki trai na ka bynta ban shna ïa ki EMRS: Lahkmen

Shillong, Naiwieng 25: U Myntri ka tnat Pule puthi ka sorkar jylla u Bah Lahkmen Rymbui ha ka sngi baar u la ïathuh ba ki la don ki jaka ba la aiti na ka bynta ban shna ïa ka Eklavya Model Residential School (EMRS) ha kylleng ka jylla.
Haba kren sha ki lad pathai khubor u Bah Rymbui u la ong ba watla ki don ki jingeh hangne hangtai, hynrei ka jingïaroh ka leit ruh sha ki shnong ki thaw kiba la ïatreilang ha kane ka bynta.
“Kam long kaba suk ia ka jylla ba kan sdang ïa kano kano ka project. Kumta hap ai ka jingkhublei sha ki shnong ki thaw bad ki dorbar shnnong, ki trai jaka, kiba la aiti ïa ki jaka na ka bynta ban shna ïa ki EMRS. Kiba bun na ki jaka la ithuh bad ba la aiti ruh sha ka sorkar bad na ka liang ka tnat kan sa shim ïa ki sienjam bad leh ïa kaba donkam,” u la bynrap.
Haba jubab ïa ki jingshah kynnoh u Bah Rymbui u la ong ba ki la don 2 tylli ki skul ba la pyndep ka Paham bad Samanda- kiba la mang bad pyntreikam da ka sorkar jylla naduh u bnai Nailur.
U la ïathuh ruh ba dangshen u Myntri Rangbah u la leit ban jurip ïa ka Amlarem sub division ha Umladkhur ha kaba la buh ka por ban pyndep ha ka 21 tarik u Lber, 2026.