Ki kynnoh pynbiej elekshon por buh mawnongrim , mynta pat mih ka surok Motsyiar – Umjaiur

Shillong, Naiwieng 30 : Ki ar tylli ki shnong ha Mawlai ba kynthup ïa ka shnong Motsyiar bad Umjaiur ha ka step sngi Saitjaiñ ki la ïoh ban sakhi ïa ka jingplie paidbah ïa ka surok kaban pynïasoh ïa kine ki shnong kiba la ap khmih lynti mynta la kumba 40 snem ei ei.
Ïa kane ka surok kaba kot kumba 2 klur eiei bad kaba jrong palat shiteng kilometre la plie paidbah da u MDC barim ka thain Bah Teibor Pathaw ryngkat ka jingdonlang ki Ophisar ka tnad PWD ryngkat u Rangbah Shnong ka Mot Syiar Bah Markhia W Nongbri bad kumjuh u Rangbah Shnong ka Umjaiur Bah Winning Kharbani nalor ki riewrangbah jong ka shnong, ki seng longkmie bad kumjuh ki seng samla.
Haba kren ha ka jingïalang hadien ba la dep plie paidbah ïa ka surok, u Bah Teibor u la pynkynmaw ba ka la mih ka jingkynthoh kaba jur ha ka por ba ki buh ïa u mawnongrim da kaba ki kynthoh ba u dei tang u mawnongrim ban pynbiej elekshon.
U Bah Teibor u la ong ba mynta pat ki nongshong shnong ki la ïohi ïa ka jingshisha ba na utei u mawnongrim ba ki buh ha utei u snem mynta pat kine ki ar shnong ki la ïoh ban pynurlong shisha ïa ka surok kaba paka kaban pynmyntoi haduh katta katta ïa kine ki ar tylli ki shnong.
Ha kajuh ka por u la ai ka jingïaroh ruh ïa ki trai jaka kiba la ai kylluid mynsiem bad kumjuh ïa ki nongshong shnong kiba la shaniah ha u kum u nongïalam ha kato ka por ba sdang ïa ka kam.
U Bah Teibor u la pynpaw ruh ba kum u briew uba thrang ban trei um ju hun ban shu pyni sha ka pyrthei ba u leit ai shithi sha ki Myntri Sorkar hynrei u da buddien na ka por sha ka por ïa ka kam la ka long na ki Myntri Sorkar bad haduh na ki ophisar jong ki department bapher bapher haduh ban da urlong ka kam.
“Ki kam kiba nga trei ha ka por ba nga dang long kum u nongmihkhmat bun ki la ïaid ba jan dep mynta bad phin sa ïohi kawei hadien kawei pat,” u la ong.
Ha kajuh ka por u la pynpaw ka jingsngewnguh ïa u Myntri Rangbah bad kumjuh ïa u Symbud Myntri Rangbah ba peit ïa ka tnad PWD kiba la pynsngap ïa ka jingkyrpad jong u na ka bynta kiba bun ki kam pynroi ha ka shnong Mawlai baroh kawei.
Na ka liang ki nongïalam shnong ki la pynpaw ka jingsngewnguh kaba khraw ïa u Bah Teibor uba la lah ban pynurlong ïa katei ka surok kaba ki la phohsniew mynta la kumba 40 snem ei ei. Ki la pynpaw ruh ba kane ka surok kaba ki ïoh ka long ka jingkyrkhu kaba khraw na ka bynta ki nongshong shnong namar mynta na ka lynti kaba khim bad shem jingeh ban ïaid baroh shi katta hynrei mynta pat ki la ïoh da ka surok kaba bha, ba heh bad kylluid wat ban ïaid kali.
Lah ban kdew hangne ba ïa u mawnongrim ban shna ïa kane ka surok la wan buh da u Symbud Myntri Rangbah ka Jylla, Bah Prestone Tynsong ha u Nohprah 2022 ryngkat ka jingdonlang u MDC ha kato ka por Bah Teibor Pathaw nalor ki nongïalam shnong.