Ki kyndon aiñ ki dei ban long kiba suk ban poi sha ki paidbah, ong u CJ ka Meghalaya

By Mawphor Editor On Oct 26, 2025

Shillong, Risaw 25: Ka National Judicial Academy (NJA), da ka jingïatreilang bad ka High Court ka Meghalaya bad ka Meghalaya State Judicial Academy, ka la pynlong ïa ka jingïalang jong ka East Zone-II Regional halor ka phang “Advancing Rule of Law through Technology: Challenges and Opportunities” (P-1464) ha Courtyard Marriott, Shillong.
Kane ka jingïalang kaba arsngi la donlang ki Hon’ble Chief Justice bad ki Judge na ki High Court ka jylla Sikkim, Manipur, Kerala, Kolkata, Guwahati, Bombay, Tripura, Jharkhand, bad Meghalaya, ha ryngkat bad ki nongkren kiba shemphang bad ki nongwad bniah halor ka aiñ kiba shim bynta ha ki jingkren bapher bapher.
Ha ka jingkren pdiang, u Hon’ble Mr. Justice Soumen Sen, Chief Justice ka High Court ka Meghalaya, u la pynpaw ka jingai khublei ïa ka National Judicial Academy bad u Director jong ka, ba la shim bynta ha kane ka jingïalang. Haba batai halor ka phang, u Justice Sen u la ong ba ki kyndon jong ka aiñ ki kdew ba ki aiñ ki dei ban long kiba suk ban poi sha ki paidbah, kiba ïaryngkat, bad kiba la pyntreikam haba shit ba shai. U la banjur da kaba ong ba ka jingïasoh jong ka bor technology hapoh ka legal system ka la wanrah ïa ka jingïaid beit ka kam, ka jingkhuid ka rukom treikam bad ka jingïoh jingshaniah na ki paidbah.
U Justice Sen u la ïathuh ruh shaphang ki rukom pyrkhat kiba don la ka nongrim katkum ki kyndon jong ka aiñ-ka jinglong ba halor jong ka aiñ, ka jingïaryngkat hakhmat ka aiñ, bad ka jingïaineh ka mynsiem jong ka aiñ-da kaba ïasyllok ruh ba kumno ka technology ka lah ban pynkhlaiñ ïa kine ki nongrim lyngba ki lad digital ban pynïaid ïa ki kam, nangta ka e-governance, ki jingshakri online, bad ka jingïarap ka AI kaba long ka atiar ban wadbniah.
Ha kawei ka liang pat u la kylli ruh halor ki jingïaleh bad jingïakhun haba ïadei bad ki jingsngewkhia ki kam shimet, ka jingpyndonkam ïa ka AI, ki jingïathuh ba ïalam bakla lyngba ki mass bad social media, ka jingduna ka jingsngewthuh ha ka kam aiñ, ki kam kiba pynsuk bad ki jingduna ki kam jingtei.
Ha kane ka sngi la ïoh ruh ka jingkren na u Hon’ble Mr. Justice Aniruddha Bose, Director ka National Judicial Academy, uba la banjur halor ka jingdonkam ka kyndon jong ka aiñ bad kiwei pat ki bynta.
Ha ka sngi ba nyngkong kane ka jingïalang la ïakren halor ka mat “Bridging the Digital Divide: Rule of e-Services,” “Electronic and Digital Media: Role of Courts,” bad “Effective Use of Technology in Alternate Dispute Resolution.”
Ha kane ka sngi la donlang ruh u Hon’ble Mr. Justice Hamarsan Singh Thangkhiew, u Hon’ble Mr. Justice W Diengdoh, Hon’ble Mr. Justice Biswadeep Bhattacharjee, bad kiwei ki heh ki haiñ na ki shnat jong ka aiñ.