Ki kop ba dei tang ma ki ba nud ban pynbeit pud, hynrei ki leh pat ïa kaba bakla: Erwin

Shillong, Nailar 22: ki seng bhalang bapher bapher na rilum Garo bad na rilum Khasi ba kynthup naduh ka GSU, ADE, AYWO, FKJGP, HITO, WKSU, JYF bad kiwei kiwei ki seng bhalang ki la pynlong ïa ka jingïakhih shong kyllaiñ myngngor ha khmat u durmot jong u Kiang Nangbah ha Barik ban dawa na ka sorar ba ka dei ban bishar bad pynbeit biang ïa ka MoU kaba la ïasoi hapdeng u Myntri rangbah ka jylla u Conrad Sangma bad u Myntri rangbah ka jylla Assam u Himanta Biswa Sarma ha ka 29 taik Lber ha Nongbah delhi ban pynkut noh ïa ka jingïakajia pud hapdeng ki ar jylla kaba la neh la da ki 50 snem.
U President jong ka FKJGP Garo Hills Zone u Pritam Arengh u la ong ba ka sorkar jylla ka la thok ïa ki paidbah ha ka jingpynbeit pud bad ka la nguid ruh la ka prie kaba ka la khlei ha shuwa ba kan don ka jingsoi MoU.
U Pritam u la ong ba ka sorkar ha kaba nyngkong ka la kam ba ka jingpynbeit pud ha ka jylla kan pynshong nongrim ha ki san tyli ki mawser kata: ka Pakit ne ka history jong kita ki jaka, ka kynhun jaidbynriew ba shong shnong ha kine ki khappud, ka jingmon ki paidbah, ka jingkham suk ha ka synshar khadar ne ka Administrative convience bad ka jinglong ki jaka ne Geographical Continuity. “Baroh San tylli kine ki mawser ban rai sha kano ka jylla ki shnong bad ki jaka kin hap ka sorkar Meghalaya kam bud satia kawei” ruh u la ïathuh.
“Lada phi peit naduh ka Tarabari sector, Pillangkata, Tarabari bad kiwei de ki jaka kiba dei ki bynta jong ki hima Khasi la shah bret beit sha assam, ki nongshong shnong kiba shong ha kine ki shnong ruh ki dei ki Garo bad ii Khas, lada peit na ka mon ki paidbah ruh ki kwah ban don beit bad ka jyla Meghalaya bad lada thew da u mawser hi ki dei ban don beit sha ka jylla Meghalaya hynrei ka sorkar kam bud wat tang kawei ruh ha ka jingpynbeit pud hynrei ka shu soi beit ïa ka MoU na bynta ka jingïohnong ka jylla Assam” u la ong.
U Pritam u la ong ba na ka liang jong ka FKJGP kan ïakhun beit haduh ban ïoh ïa ka hok long trai ïa ki jaka puta kaba la hiar pateng naduh mynhyndai bad ruh kan ïai trei ban pynshai sha ki paidbah ïa ka jingshah ktah na ka jingpynbeit pud bad ruh kan ai jingkyrshan ïa ka kynhun kaba la ïalam da u Muktiar ba pawnam ka jylla u Bah Erwin Sutnga ban leit tied jingkhang sha ka Supreme Court ban pyndam ïa kane ka MoU.
Haba ai jingkren ha kane ka sngi u Chairman jong ka JACBOM u Bah Erwin Sutnga u la takraiñ tyngeh ïa ka sorkar jylla halor ka jingkam ba ju mihman ka por na ki myntri sorkar ba dei tang ka sorkar MDA ba ïalam da ka NPP kaba lah bad kaba nud bad ïaid shakhamat ban pynbeit noh ïa u pud u sam hapdeng ka jylla Meghalaya bad Assam.
“Ki kop ba ki la ïaid shakmat ban pynbeit pud hynrei ka long pynban ka jingibiej namar ka jingpynbeit pud kam dei kat kum ki kyndon aiñ bad ka long ruh ka jingiuhroit ïa ka sur bad ka mon u paidbah. Ki nud keiñ, hynrei mano ban ïaroh haba ki nud ha ka lynti kaba bakla bad lada dei ba ki nud ha ka lynti kaba dei balei kim shim lang ïa ka kaiphot kaba ka komiti ba la khlieh da u bah HB Dann kum u shong knor ba la thung da ka sorkar ha ka por iu Bah EK Mawlong kum u Myntri Rangbah bad balei ki shim tang ïa ka kaiphot jong u snem 2011” ong u Bah Erwin
U la ong ruh ba ka jingpynbeit pud hapdeng ki ar tylli ki jylla ka long beit ka jingïohnong ïa ka jylla Assam ha kaba u Myntri Rangbah ka jylla Assam u Himanta Biswa Sarma u la ong ba kum kane ka pynbeit pud yn ym ïoh da kiwei pat ki kabu ban khap pynïohnong ïa ka jylla Assam namar ka Assam kam duh kyndew shidana hynrei ka ïoh shi ïoh pynban.
“Kat kum ki kyndon jong ka Land Transfer Act la khang ban die bad ai jaka sha ki bym dei Khasi hynrei ka sorkar Meghalaya ka aiei syndon sha ka Assam ïa ka jaka bad kane hi ka dei ka jingphynkheiñ ïa ki kyndon ka Land Transfer Act ” u la ong
U Bah Erwin u la ong ruh ba wat ïa ka Riti synshar ka ri India ruh la pynkheiñ namar kat kum ki kyndon hapoh ka Sixth Scheduled ka sorkar kam don jaka hynrei dei ki riew paidbah kiba longtrai ym ka sorkar.
“Ha kino ki kyndon aiñ ka sorkar ka lah ban aiti jubor pyrshah ïa ka mon ki trai jaka sha ka sorkar Assam namar ka sorkar lei kam don jaka ki jaka kiba ka don ruh tang khyndiat eh ha sor Shillong” u la ong.
Shuh shuh u la ong ba na ka liang jong u, u la ïoh lum ïa ki kot ki sla bad wat ki map kiba naduh u snem 1835 terter ban pynskhem ïa ka jinglong trai ïa ki jaka kiba ka Assam ka la klun jubor ban shen hi na ka liang ka kynhun kan leit tied jingkhang sha Supreme Court ban pyndam ïa ka MoU ba la ïasoi da ki ar Myntri Rangbah.
U Bah Erwin u la ong ruh ba kane ka jingkyrkieh ka sorkar ban pynbeit ïa u pud u sam khlem da sngap ïa ka sur u paidbah ka long beit thik na ka daw ka jingïohnong saiñ pyrthei da ka sorkar.
Na ka liang u president ka FKJGP seng kmie u Bah Dundee Khongsit u la ai ka jingkular ba kium ka seng hi kan don lang ryngkat bad ki paidbah khappud ha kino kino ki sienjam kiba ki shim halor ka MoU.