Shillong, Nailar 16 : Lait noh ha nongbah Shillong kaba dei ka nongbah jongka jylla ba la pynher ïa ka lama ka Ri da u Myntri Rangbah ka jylla u Conrad K Sangma, ki kongsan kiba la pynher ïa ka lama ka ri ha kiwei ki District bad Sub Division ki long kumne.
Ha nongbah Tura, West Garo Hills u kongsan ba pynher ïa ka lama ka ri u dei u Symbud Myntri Rangbah ka jylla u bah Prestone Tynsong. Ka jingrakhe ka la long ha madan ïalehkai ka Matshakolgre LP School, New Tura. Ki don haduh 13 tylli ki kynhun kiba la ïashim bynta ha ka Parade bad shim salute da u kongsan. La ïadon lang u DC, SP bad kiwei kiwei ki ophisar, ki Principal na baroh ka district.
Haba kren ha ka jingrakhe u Symbud Myntri Rangbah ula kynmaw burom ïa ki nongseng nongrim ïaka ri India kum u Mahatma Gandhi, Pandit Jawaharlal Nehru, Sadar Vallabhai Patel, Subhas Chandra Bose bad dei lyngba jongki ba la mih kane ka ri Synshar Paidbah kaba khraw. Ula kynmaw burom ruh ïa ki khlawait ka jylla kum u Tirot Sing Syiem, u Kiang Nangbah, Pa Togan Nengminja kiba la aiti ïa la ka jingim ban ïa khun ïa ki shipai dohlieh ban ïoh ïa ka jinglaitluid.
U la kynmaw burom ruh ïa ka jingaiti lut bad len lade ki martyr na ki bor shipai, ki bor pulit jongka ri kiba la pha ïa la ka jingim ban ïada ia ka ri.
U Bah Prestone ula pynkynmaw ruh haduh katno ka jingshah ktah ka jylla na ka jingshah lyngshop ha ki bor mariang mariang bad u phah ïaka khubor sngewlem sha ki longïing longsem kiba la duh ïa kiba ieit bathoiñ jongki ha kane ka jingjia. Ula ong ba ka shongsuk shongsaiñ ha ka jylla kala wan phai hynrei kan dang ïai pynkhlaiñ ïa ki bor pahara jongka bad dei ruh halor kane ba ka sorkar ka la mang pisa pat ban pynbha ïa ki jingdonkam jong ki pulit nadong shadong.
Ha Nongstoiñ u kongsan ba pynher ïaka lama u dei u myntri ka tnad Water Resources u bah Brolding Nongsiej. Ki don 12 kynhun kiba shim bynta ha ka Parade bad shim salute da u Myntri. Ka jingrakhe kalong ha madan ïalehkai ka St Peter Higher Secondary School.
Ha Nongpoh u kongsan ba pynher ïaka lama ka ri u dei u myntri ka tnad C & RD u bah Hamletson Dohling. Ki don 27 tylli ki kynhun kiba ïashim bynta ha ka parade bad shim salute da u kongsan. Ka jingrakhe ka long ha NSCA Mini Stadium Pahamsyiem.
Ha Jowai u kongsan uba pynher ïaka lama ka Ri u dei u myntri ka tnad Transport u ma Dasakhiat Lamare bad ki don haduh 32 tylli ki kynhun ba shim bynta ha ka Parade bad shim salute da u myntri. Ka jingrakhe ka long ha madan ïalehkai Jrisaleiñ, Chutwakhu.
Ha Williamnagar u kongsan uba pynher ïa ka lama u dei u MLA Marcuise N Marak. Ki don 30 tylli ki kynhun ba shim bynta ha ka parade bad shim salute da u kongsan. Ka jingrakhe ka long ha madan ïalehkai ka Rongrenggre Govt. Higher Secondary School.
Ha Baghmara u kongsan uba pynher ïa ka lama ka ri u dei u Thomas A Sangma, MLA Tura bad ki don 15 kynhun kiba shim bynta ha ka Parade bad ka jaka ba rakhe kal ong ha madan jongka District Sport Office, Baghmara.
Ha Resubelpara u kongsan ba pynher ïa ka lama ka ri u dei u Timothy D Shira Symbud Shongknor bad ki don 26 tylli ki kynhun kiba ïashim bynta ha ka Parade bad ka jaka ba rakhe ka long Mini Stadium Resubelpara.
Ha Mawkyrwat u kongsan ba pynher ïa kalama ka ri u dei u Myntri ka tnad PHE bah Renikton Lyngdoh Tongkhar. Ki don 7 kynhun kiba shim bynta ha ka parade bad ka jingrakhe ka long ha madan jongka Nativiti Higher Secondary School, Mawkyrwat.
Ha Ampati u kongsan ba pynher ïa ka lama ka ri u dei u Myntri ka tnad Food and Civil Supply bad tnad ka koit ka khiah u James P.K Sangma. Ki don 14 tylli ki kynhun ba ïashim bynta ha ka parade bad ka jaka ba rakhe ka dei ha Mini Stadium, Ampati.
Ha Khliehriat u kongsan uba pynher ïa ka lama ka ri u dei u Myntri ka tnad Social Welfare u ma Kyrmen Shylla . Ki don 26 tylli ki kynhun ba ïashim bynta ha ka parade bad la pynlong ïa ka jingrakhe ha madan ïalehkai ka Khliehriat Higher Secondary School.
Ha Mairang u kongsan ba pynher ïa ka lama ka ri u dei u Lamphang ka ïing dorbar thawaiñ ka jylla u bah Metbah Lyngdoh. Kiba shim bynta haka parade ki dei ki pulit ka jylla, Home Guards, Scout and Guides bad ki skul bapher bapher bad ka jingrakhe ka long ha Madan Dommawlum.La leit buh syntiew ruh ha u Mot jong u Tirot Sing Syiem ha Madan Mot Tirot, Mairang Mission.
Ha Sohra Civil Sub Division u kongsan u long u myntri ka tnad Sport bad Youth Affairs bah Banteidor Lyngdoh. Ki don 16 kynhun kiba ïaid parade bad shim salute da u kongsan. ka jingrakhe ka long ha Sohra Sport Stadium, Saitsohpen.
Ha Amlarem Civil Sub Division u myntri ka tnad kam pohïing u ma Lahkmen Rymbui u la long u kongsan ba pynher ïa ka lama ka ri bad shim salute na ki 6 tylli ki kynhun ba ïaid parade. Ka jingrakhe ka long h ha Amlaren Sub Division Sport Association Mini Stadium, Ladjaplem.
Ha Dadenggre Civil Sub Division u kongsan uba pynher lama u dei u Abdus Saleh bad ki don 13 tylli ki kynhun ba ïashim bynta haka jingïaid parade.
Ha Pynursla Civil Sub Division u kongsan ba pynher ïa ka lama u dei u bah Macmillan Byrsat MLA ka Nongstoiñ bad ki don 14 tylli ki kynhun ba shim bynta ha ka parade. Ka jingrakhe ka long ha Urksew Umkor, Pynursla Sport Club Stadium.
Ha Chokpot Civil Sub Division uba pynher lama u dei u Raymaond Shira, ha Raksamgre uba pynher lama u dei u N Hajong, ha Mawshynrut uba pynher lama bad shim salute u dei u bah Gigur Myrthong bad ki don 16 tylli ki kynhun ba parade ha madan Riangdo.
Ha Ranikor uba pynherlama kum u kongsan u dei u bah Pius Marwein bad ki don 4 kynhun kiba ïaid parade bad ka jingrakhe ka long ha madan Nolikata, Ranikor.
