Nongstoiñ, Naiwieng 21: Ka ophis u Deputy Commissioner ka West Khasi Hills lyngba ka Meghalaya MECD Mission ha ryngkat ka jingïatreilang bad ki seng niam, ki tnad treikam bapher bapher jong ka sorkar ba kynthup ïa ka ICDS, ka tnad ka koit ka khiah, ka tnad pule puthi bad ka MSRLS, ha ka 20 tarik Naiwieng ka la pynlong ïa ka prokram ba kyrpang ha Vanni’s Hall St Peters Pyndengrei, ha kaba ka phang ka long ka shong suk bad ka koit ka khiah jong ki nongshong shnong hapoh ka District.
Ha katei ka prokram la pynlong ïa ka jingpynshai paitbah bad ka jingïaphylliew jingmut ba la lamkhmat da u Bah Garod L.S.N Dykes IAS Deputy Commissioner ka West Khasi Hills, ha ka jingïadonlang jong u Bah H. K. Thabah MCS Additional Deputy Commissioner, Bah R. Kharkongor BDO ka Mawshynrut Bah E. Lyngdoh BDO ka Nongstoiñ, ki ophisar na ki tnad treikam bapher bapher jong ka District bad ki nongïalam niam na ki kynhun balang bapher bapher, ki rangbah shnong ba kiwei kiwei ki riew rangbah kiba don ha ka thaiñ Nongstoiñ.
Ha katei ka sngi la sdang da ka jingïaphylliew jingmut halor ka phang ba ka Meghalaya Early Childhood Development, kaba dei ka mission jong ka sorkar ka don ïa ka jingthmu, ban pynthikna ba man la iwei pa iwei i khynnah kin ïoh ïa ka nongrim kaba skhem naduh ba i la sdang ban seng nongrim ïa la ka jingim.
Nalor kata ka jingïaphylliew jingmut ka long na ka bynta ki lad ban pynbha ïa ka jingsumar ïa ki longkmie ba kan ym dei ban don ka jingduna bam, ban kyntiew ïa ka pule dangle naduh ki khynnah kiba dangrit, ban pynkhlaiñ ïa ka jingtrei kam jong ki longïing longsem ban pynthikna ruh ba ki khynnah ki dei ban im ha ki jaka ba shngaiñ, khnang ba kin heh kin san ha ryngkat ka jinghun mynsiem.
Kane ka jingïaphylliew jingmut ka dei ruh halor ka phang kumno ba ki kynhun niam, kin shim lem ka jingkitkhlieh na ka bynta ban kyrshan lang ïa ka sorkar, ha ka ban peit lem ïa ki jingeh kiba ka imlang sahlang hapoh ka district ka mad ha kine ki sngi, kum ha ka koit ka khiah ban lait na ka jingïap jong ki longkmie ha ka por ba ki kha khun bad ruh ka jingïap jong ki khunlung ha ka por ba dang shu kha kiba la kynjoh shi snem ka karta, ka jingduna jong ka jingsan ki khynnah.
Kiwei pat ki mat ba donkam ba la ïoh ban ïatai bad ïaphylliew jingmut ki long halor ka jingkiew jong ka jingdon ki khynnah kiba pep skul shiteng por, ka jingbym biang ha ka bam ka dih, ka jingkynrei jong ki jingdih pynbuaid kum ka kyiad bad u drok kaba la ktah haduh katta katta ïa ka imlang sahlang.
Ha katei ka sngi na ka liang ki bor pynïaid district lyngba ka ophis jong u Deputy Commissioner, ka la ai khublei ïa baroh ki kynhun treimon sngewbha kiba don ha ki shnong ki thaw bad ha kylleng ki jaka hapoh ka district, kiba la trei shitom bad kiba la noh synñiang ban shakri ïa ki paitbah bad ka imlang sahlang ha baroh ki liang.
