Ki khubor rakhe ïa ka National Sports Day:Ryngkat ki jingïalehkai tynrai la rakhe 2 sngi lynter ïa ka National Sports Day ha Jowai
Jowai, Nailar 31: Ka ophis treikam u Deputy Commissioner ka West Jaiñtia Hills ha ryngkat ka jingïatreilang bad ka ophis u District Sports Officer, West Jaiñtia Hills ha kane ka 29 bad ka 30 tarik Nailar, 2025 kum ka dak ban ïasnohktilang ban lehburom ïa ka ‘National Sports Day’ la pynlong ïa ki prokram ïalehkai bapher bapher ha Madan Kiang Nangbah Stadium, Jowai.
Ka thong ba hakhmat jong ka Sorkar India ban pynlong ïa kane ka National Sports Day, ka long haka nongrim ban kynmaw burom ïa u nongïalehkai Hockey ba paw nam jong ka Ri India u Major Dhyan Chand.
Ha ka sngi nyngkong jong kane ka National Sports Day hashwa ban sdang ki prokram ïalehkai na ka liang u Khroobok Passah, District Sports Officer, West Jaintia Hills ula ïalam khmat ban pule lang ïaka Fit India Pledge ba la shim byntalang da baroh kiba wan sha kane ka sngi.
Ïa kane ka National Sports Day la wan ban sakhilang kumjuh da u Marsooki Kyndait uba long u wei na ki Athlete ne u nongïamareh ba paw nam jong ka Ri-Lum Jaiñtia uba la wanrah nam rah burom ïa ka District bad ïa ka Jylla hi baroh kawei ha kiba bun ki jingïakop.
Ki jingïakop kiba la pynlong na ka bynta ki khynnah skul shi bynta na kane ka National Sports Day ha Jowai ki kynthup ïa ki jait jingïalehkai tynrai (Traditional Sports) ba kynthup ïa ka jingïatan tyllai, ka Dat Mooniaw kumjuh la pynlong ïa ka jingïalehkai Football.
Katba haka sngi ba ar jong kane ka National Sports Day la pynlong ïa ka jingïalehkai Badminton (Competition) ha Kiang Nangbah Indoor Sports Complex ha kaba u samla Mebanker Shullai uwei na ki nongïalehkai Badminton ba paw nam ka District bad ka Jylla ula wan ban donlang kum u kongsan.
La pynlong ruh ïa ka Children Sports for Grass-root ha Madan Kiang Nangbah Stadium kumjuh ruh ka jingñiah Cycle Rally kaba la sdang na Kiang Nangbah Stadium shaduh Tlumuwi.
Ha ka jingïalang ban pynkut ïaka Children Sports For Grass-root kaba pynïaid daki Football Coach jong ka WJDSA ba kynthup ïa u Milan Lynrah, Dawanohi Shullai, u Pink Suting bad u Amity Tongper la wan ban don long da u ma Khroobok Passah, DSO, West Jaiñtia Hills uba la ai ki kyntien pynshlur bad ai mynsiem ïa ki khynnah halor ka thong jong ka ‘National Sports Day’.