Shillong, Nohprah, 11: Ka Bharatiya Janata Party (BJP) ha North Shillong Constituency ka la nang ïohbor hadien ba ki nongïalam jong kane ka seng saiñpyrthei ki la rung sha manla ki thliew ing bad sha ki kyndong kynshrot ban pynsngewthuh sha ki paidbah ba kane ka party kaba bat ïa u lakam synshar ha Delhi bad kaba ïatreilang hapoh ka Sorkar Meghalaya Democratic Alliance (MDA) ha kane ka Jylla kam dei satia kaba pyrshah ïa ki Khristan bad kaba khang ïa ka riti ka dustur katkum ba la pynsngewthuh da kiwei pat ki seng saiñpyrthei kiba hap ban ïakhun pyrshah ïa ka bor ba khlaiñ jong ka BJP.
Ha ka Sngi Saitjaiñ da ki spah ngut ki longkpa, ki longkmie bad ki samla ki la pynrung kyrteng ïalade kum ki dkhot jong ka BJP ha ka jingpynrung kyrteng kaba la long ha ka shnong Riatsamthiah, Shillong.
U State Executive Member jong ka BJP u Bah M. Kharkrang uba long ruh u nongpan tiket na ka BJP ban aireng na North Shillong Constituency ha ka Elekshon sha ka Iingdorbar Thawaiñ ka Jylla ka ban sa long ha u snem 2023 ha ka jingïakren bad ki lad pathai khubor u la ong, “ka jingpynrung kyrteng ïa ki paidbah khamtam ha ki shnong ba sah ki Khasi ki la kham bun bad kat haduh ka mynta ki la don kumba shispah ngut eiei bad ngi khmihlynti ba kin dang don shuh shuh ki ban wan pynrung kyrteng ïalade namar kiba bun hi ki dei kiba hap ban beh sha ki kam ki duk lajong naba ka dei ruh ka sngi Saitjaiñ. Kat haduh ba ynda la pynkut ïa ka jingpynrung kyrteng ngi khihlynti ba kin poi haduh arspah ngut eiei ki ban wan pynrung kyrteng.”
Haba kyllli, ha kano ka rukom ki nongïalam ki leit ban pynsngewthuh sha ki paidbah ïa ki jingthmu bad ki nongrim treikam jong ka BJP, u Bah Kharkrang u la ong, “ha kaba sdang ka la shim por ban pynsngewthuh kaei ka jingthmu jong ka party BJP ha kane ka jylla Meghalaya bad kane ka jingwan pynïasoh jong ki mynta bad ka BJP ka pynpaw shai ba ki Khasi ruh ki la pdiang ïa ka BJP ba kan wan ha ka bor synshar ha kane ka jylla namar haba kut ki sngewthuh ba dei tang kane ka party kaba lah ban wanrah ïa ki song pynroi ha kane ka jylla.”
“Ngi la pynsngewthuh ïa ki (paidbah) naduh ba ka BJP ka la synshar ha Delhi, la ar samoi ba ka BJP ka la bat u lakam synshar ha India ym pat ju don kata ba kin khang ïa ki Ingmane, ban khang bam doh masi. Ngi la ngi pynsngewthuh ïa ki paidbah ba kine ki dei tang ki jingpynsngewhuh bakla jong ki seng saiñpyrthei kiba pyrshah ïa ka BJP bad bun ki briew ki dei kiba la nang la stad khamtam ha kane ka pyrthei Social Media ki la ïohi ba ka jylla jong ngi la hiar haduh katta katta,” u la ong.
“Ki (paidbah) sngewthuh ba lada yn dang ailad (ïa kiwei pat pat ki seng saiñpyrthei ban bat ïa u lakam synshar) un sa poi u pud ba ngin ym lah shuh ban kiew lano lano ruh. Ha u snem 2023, tang ka BJP kaba lah ban kyntiew ïa kane ka ri bad ka jaidbynriew jong ngi,” la bynrap u Bah Kharkrang uba long ruh u State Spokeperson jong ka BJP.
Haba kylli, ha kano ka rukom ki nongïalam jong ka BJP ka pynsngewthuh ïa ki samla ban sngap ïa ki jingeh jong ki namarba ki don ruh ki samla kiba wan pynrung kyrteng ïalade, u Bah Kharkrang u la ïathuh, “ngi la pynsngewthuh ïa kiba bun ki skhim ba ka Sorkar BJP ha Delhi ka la pynmih kum ka MUDRA Scheme kaba biang palat na ka bynta ki khynnah samla. Ngi ju ong ïa ki balei phim long ki nongaikam bad ki nongsengkam. Lyngba kane ka MUDRA Scheme la ju ai ïa ka ram ba ki khynnah samla kin dup lah ban sdang ïa ka kam lajong da kaba siew pat ïa ka sut kaba jem. Haduh mynta ym pat ju don kawei ruh ka Sorkar kaba pynmih kum kane ka skhim.”
Shuh shuh u la ong, “ki khynnah samla ki la duh jingkyrmen bad mynta ki phai khmat sha ka BJP ba kan leh eiei na ka bynta jong ki bad mynta kim ngeit shuh ïa ki jingshah pynsngewthuh bakla shaphang ka Niam bad mynta ki la sngewthuh bad ban rai ba ka BJP ka ladei ban synshar ha kane ka jylla jong ngi.”
U Bah Kharkrang u la ïathuh ruh ba ka jingpynrung kyrteng kan sa nang bteng ha kine ki sngi, ki taiew bad ki bnai ki ban dang wan ha ki Polling Booth bapher bapher hapoh ka Constituency.
