Ki khappud kim dei ki bynta ba kut ka India hynrei dei ka jingsdang, ong ka Sitharaman ha Sohbar

Shillong, Naitung 12 : Ka Myntri ka tnad Platyngka jong ka Sorkar Pdeng, ka Nirmala Sitharaman hynne ka sngi ka la hiar sha Sohbar, ka shnong kaba don ha khappud bad ka Bangladesh, East Khasi Hills kum shibynta ban buddien ïa ki kam jong ka sorkar ban kyntiew ïa ki khappud lyngba ka skim Vibrant Villages Programme (VVP).
Haba kren ha ka jingïalang kaba la donlang naduh ki nongshong shnong, ki khynnah skul bad kolej ryngkat ki heh sorkar, ka Myntri ka la ban jur ba ki shnong khappud kum ka Sohbar kim dei kiba bynta ba khatduh, hynrei ki dei ki jaka ba nyngkong eh ban ïakynduh ïa kito kiba rung sha India. “Ka long ka burom kaba khraw ban don ha Sohbar mynta ka sngi. Nga la jied ïa kane ka jaka namar ba u Myntri Rangbah u ngeit ba ki shnong khappud kim dei ka jingkut jong ka ri India, hynrei ka dei ka jingsdang jong ka. Kine ki dei ki khmat bad ki shkor jong ka Ri jong ngi, bad ki dei hok ban ïoh ïa ka roi ka par kaba hakhmat eh”, la ong ka Myntri.
Ka Myntri ka la kdew ba ka bynta kaba ar jong ka Vibrant Villages Programme mynta ka la pynïar ïa ka jingshakri jong ka sha ki thain khappud ka thain shatei lam mihngi, kynthup ïa ka jylla Meghalaya. Ka la pyntip ruh ba ki don saw tylli ki bynta ba kongsan na ka bynta ka VVP ha Sohbar – Ki jingtei surok, ka jingpynïasoh ha ka liang ka telecom bad digital), ka jingshakri lyngba ki telelivsion bad ka jingïoh ïa ka bording.
Ka Myntri ka la pynthikna ba baroh ki jingshakri ba kongsan bad ba donkam, kynthup ïa ka jingïoh ka jingshakri lyngba ki bank hapoh ka jingjngai kaba 5 km, ka pule puthi, bad ki jaka ai jingsumar (PHC), yn pynthikna hapoh ka prokram. “Nga la ïakren bad u District Collector. Da palat 1,600 ngut ki briew kiba sah hangne, ka VVP kan pynthikna ba man la ki longïing kin ïoh ïa ka jingmyntoi.Ym don mano mano ruh ban shah iehnoh,” ka la pynskhem.
Da kaba ithuh ïa ki lad ba ïadei bad ka kam jngoh kai ha Sohbar, kaba don ha khappud jong ka wah kaba itynnad bad kaba la ker sawdong da ki jaka ba jyrngam, ka Myntri ka la ai khublei ïa ka Sorkar Meghalaya kaba la thmu ban pynlong ka jaka pdeng ha kaba ïadei bad ka kam jngohkai pyrthei da ka jingïarap na shabar, kynthup ïa ka jingkyrshan na ka New Development Bank (NDB). “Ki jingdon jingem ba ïadei bad ka kam jngohkai pyrthei kin wanrah ïa ki nongwan jngohkai pyrthei bad kin pynmih ïa ki lad kamai kajih, kaba pynlong ïa ka ïoh ka kot jong ka thaiñ jong phi kaba kham khlain,” ka la ong.
Ka la ïakren ruh bad ki samla bad ka la pynpaw ka jingsngewnguh ïa ka jingdon bun ki samla pule kynthei ha ka jingïalang. Ka la ban jur ïa ka jingdonkam jong ka jinglah ban ïoh ïa ka digital, ka jingkyntiew ïa ka pule puthi, bad ka jingkyrshan ïa ki nongtrei kti, da kaba pynpaw ba ki samla ha ki thain khappud ki dei ban ïoh ia ka lad ban kiew ha ka thain. “Ka shnong jong phi ka dei ban plie ki lad ki lynti, ym ban pynlong ïa phi ban leit buhai shnong. Da ki atiar digital bad ka jingpynpaw pyrthei, wat ki nongtrei kti na Sohbar ki lah ban khring ïa ki nongthied na kylleng ka pyrthei,” ka la ong.
Ha ka jingkren pynkut jong ka, ka Myntri ka la pynpaw ka jingbym lah ngeit ba ym shym la don uwei ruh u Myntri ka sorkar pdeng uba la wan jngoh ïa ka Sohbar mynshwa. “Ka long kaba ym lah ban ngeit ba nga dei ka Myntri Sorkar Pdeng ba nyngkong ban wan jngoh ïa kane ka shnong kaba itynnad. Hynrei mynta, ki jingkhang ki la plie. Kane ka dei ka jaka ba pahuh u slap, ka imlang sahlang kaba ïar, bad ka long kaba kordor ïa man ka khyllipmat kaba nga pynlut hangne. Nga kyntu ïa ki nongshong shnong ban bteng ka jingïatreilang bad ka sorkar bad ïarap ïa ngi ban sngewthuh kham bha ïa ki jingdonkam jong phi,” ka la ong.
Ka jingleit jngoh ka pyni ïa ka por kaba kongsan ha ka jingpyrshang jong ka sorkar pdeng kaba dang ïaid shakhmat ban pynkylla ïa ki shnong khappud jong ka India sha ki kor jong ka roi ka par, ban pynthikna ka jingpyntreikam pura ïa baroh ki skhim jong ka sorkar pdeng bad ban thaw ïa ki shnong kiba khlain, kiba lah ban kyrshan dalade.