Ka jingpoi bad shimti ka kyrdan longkmie longkpa ka dei ka lyngkor kaba khia ïa ka ïing ka sem ban ialam ia ki khun sha ka jingbha bad ka koit ka khiah hapdeng jingieit bad ka jingsngewthuh phim dei pat ban kheiñ sting. Kum ki kmie ki kpa, phi kwah ka ba bha tam na ka bynta ki khun jong phi tang ka jingphikir shaphang jong ki kam da dei eh ka lynti. Ki kmie bunsien ki ju khuslai ruh halor ki nutrient n aka bytna ki khun bad kaei kaba ki kwah ka dei ka jingpynbiang ki jingbam ba kynsai tam naka bynta jong ki. Ki kmie ki kpa ki dei kiba don ka jingbahkhlieh ha kiba bun ki liang – naduh ka jingaiti ka bor met, ka bor sngew, ka bor pyrkhat napdeng kiwei de bad ka long ruh kaba kongsan ba kin phikir ha ka rukom kaba dei na ka bynta ki khun ki kti jong ki.
Kham bunsien la shem ba kiba bun ki kmie ki kpa ki ju angnud bad kin don katto katne ki lynti kiba lah ban ai jingmut ïa ki kaei kaba dei bad kaba bakla ban leh na ka bynta ki khun, bad kwah ruh ban da don da ka jingthoh. Hynrei kum kane ka dei kaba ym lah satia ban urlong, namar manla iwei pa iwei i khunlung ki heh ki san ha la kajong kajong ka rukom.
Kine harum ki long tang katto katne napdeng ki lynti kum ki kmie ki kpa ba don ka jingkitkhlieh :
Ka jingïajan : Kane ka long kawei napdeng ki lynti ba kongsan tam kum ki kmie ki kpa. Ban hap ha kane ka thup kum ki kmie ki kpa kiba bha ka long kaba donkam ban long jan bad sngewthuh halor ka jingsngew ki khun, ki khun ki don lypa ka jinglong jan bad ki kmie ki kpa wat lada ki don ka jinglong jan bad kiwei pat la ka long bad kiba haïing hasem ne bad ki briew kiba shabar hynrei ka jingjan jong ki khun ka kham dawa bha hapdeng ba ki kynduh bad mad jingeh. Kumta ka long kaba donkam ba ki kmie ki kpa kin long jan bad la ki jong ki khun bad pynlut kham bun ka por bad ki.
Ka jingburom: Bunsien ngi ju khmih ka jingburom na ki khynnah tang na ka daw ba ki kham rit bad kham duna ka jingtip ban ïa kiba la heh la san, bunsien kiba la heh la san ki ju klet ba ka long kaba donkam ban shimkhia halor ka jingburom bad ka jingpyrkhat lang n aka bynta jong ki bad kane ka paw ruh kumjuh na ka bynta ki kmie ki kpa halor ki khun. La kdew ba ki khun kiba ïohpdiang ka jingburom na ki kmie ki kpa ki kham heh ka hippocampus ka bynta kaba don ha ka jabieng bad kham khlaiñ ka bor kynmaw, ka jinglah bat ki jinghikai bad ka jingpynshah shkor. Ki khynnah donkam ban hikai da ka jingieid ym satia da ka jingjubor, donkam ban ailad ba ki lah ban pynpaw ka jingsngew ba ki don bad ai jingïarap halor ka jinglong ba kyrpang ba ki lah ban don.
Hikai ïa ki khun ba kin long kiba don akor : Kawei napdeng ki lynti kaba lah ban pynbeit bad wallam ka jingdon akor jong ki khun ka dei ka jingpynshitom manla ka por ba ki leh ki kam kiba ym lah satia ban pdiang, kaba lah ban bsuh thied ka jingtieng ha ki bad kin sangeh halor ka jingbteng ban leh kum kine ki jait kam. Sa kawei pat ka lynti halor ka jingpynbeit ïa ki khun ka dei ka jinghikai da ka lynti kaba dei naduh ba ki dang rit. Lada ki shim ka jinghikai na katei kaba nyngkong ki paw ba ki ïoh bad pdiang da ka jingtieng, bad lada ki bud da kane ka lynti ki sngewthuh halor ka jingïapher kaba dei bad kaba bakla, bad balei kim dei ban bteng ban leh kine ki jait kam. Ka jinghikai kaba dei ban long kiba don akor bad ïaid beit ha ka lynti kaba dei ka dei kaba lah ban tei ï aka jingim jong ki bad ki lah ruh ban shim ï aka rai kaba bha ha ka lawei ka jingim jong ki.
Long ki kmie ki kpa kiba shimkhia : Sa kawei ka lynti kaba phi donkam ban leh kum ki kmie ki kpa kiba bha ka dei ka jingpeit thuh halro ki dak bad ki jinglong ba ki khun ki don bad pynkhreh ban long kiba shah shkor. Kaba mut ba ka long kaba donkam ban shah shkor bad khmihthuh halor ka long ka man ki khun. Kumjuh ruh ka kdew ban don ka jingïadei kaba jan bad la ki jong ki khun khnang ba lah ban kiar na kino kino ki jingthut halor ka jingïadei bad ki.
Ailad ba ki khun kin lamkhmat : Ki don bun ki khun kiba duh ka lad ban shim rai wat ynda la kham heh kham san, hynrei kynmaw ba watlaphi dei ki kmie ki kpa hynrei phi donkam ban ailad ïa ki khun ban shim ïaka rai, hynrei ha kajuh ka por phi donkam ban pynsngewthuh kaba bha bad kaba sniew, bad ïamir jingmut bad ki lada ki shim ka rai kaba bakla, hynrei ka jingkhang syndet ka dei kaba lah ban ktah ka jingskhem jingmut ba ki don bad lah ruh ban wallam ka jinglong artatien ha ka lawei ka jingim jong ki. Kin ym lah satia ban pynpaw la ka jong ka jingsngew shabar na la ïing, namar kin sngew ba ym don ba pynshah shkor wat tang ha la ïing ruh.
