Shillong, Nailur 08 : Ki MDC jong ka Congress kiba don ha ka liang pyrshah ha KHADC ki la kynnoh ba ka jingthmu jong ka sorkar ban pyntreikam beit ïa ka CrPC bad CPC ha baroh kawei ka jylla khlem pep kan sa pynkylla iingjah lut ïa baroh ki kashari jong ka District Council.
“Ka sorkar ka la knieh shwa ïa ki skul Lower Primary bad hadien sa ïa ka Scheduled Tribe na District Council bad mynta pat sa ïa ka bor bishar ha ki kashari jong ka District Council lyngba ka CrPC bad CPC. Kumta kan sa poi ka por ba ki Kashari jongngi baroh kin sa khang lut bad kin sa kylla iingjah,” ong u Nongïalam ka Liang Pyrshah ha KHADC, Bah PN Syiem haba kren bad ki lad pathai khubor.
Shuh shuh u ong ruh ba wat ki Phareng ruh ki khlem ktah ïa ka bishar khadar tynrai jong ki Khasi bad katei ka ïai bteng tad haduh ba ka India kan ïoh ïa ka jinglaitluid.
“Ka sorkar kadei ban rah biang ïa kane ha ka kynhun Myntri ban pynkylla biang bad pyllait ïa kitei ki kyndon na ki jaka ba hap ha District Council,” u la ong.
Halor kane ka bynta, u Bah PN Syiem u la ïathuh ruh ba ki hap ban shong pyrkhat lang bad ki shnong ne ki Hima ban ïohsngew pat ïa ka sur na ki, kaei kaba ki don ban ong haba ïadei bad kitei ki kyndon lada ka treikam.
U Bah Ronnie V Lyngdoh MDC ka Congress na Mylliem pat u la ong ba ki ïoh ïa ka sorkar jylla kaba ha ka jaka ban ïada ka la thmu pynban nang pynduh. “Lada ka long kumne ngin nang shah ñiom ha u heh paid. Wat ki Phareng ha ka por ba synshar ma ki kim ktah satia ïa ka bor bishar hynrei kane ka sorkar pat ka kwah ban pynduh,” u la ong.
