Ki kam nonghikai ba lait ha WGHD, ki lah ban ïaid lait na ka bhah thungkam thungjam: C. Momin

Shillong, K’ Lyngkot 25: U nongtrei monsngewbha (Social activist) u Cherian G Momin u la pynpaw ïa ka jingsngewkhia ba ka jingtyrwa jingpynbna na ka bynta ki kam nonghikai ba lait thylli ha West Garo Hills ka lah ban ym ïaid katkum ka bhah thungkam thungjam jong ka jylla ne ka State Reservation (Roster) Policy.
Katkum ka jingong jong u, u Momin, u la ïathuh ba ki la don bun tylli ki kam hikai kiba la lait thylli ha ka kyrdan deficit higher secondary school ha ka district, kynthup ïa ki kam kiba lait bun hapoh ka Jana Priya Higher Secondary School, Bholarbhita.
U la ong katba ki jingpynbna jong ka sorkar bad ki hukum na ki ophisar ka la batai shai ïa ka jingdonkam ban pyntreikam ïa ka reservation roster sha baroh ki kam ba la mang hapoh ki skul ba la kyrshan da ka sorkar bad ki jaka pule grant-in-aid, laitnoh ki jingpynbna kiba la pynmih ha shwa jong ka 24 tarik u Nailar, 2024, ha kaba kam shym la don kano kano ka jingpynbna kaba la pynmih ha shwa ka cut-off date haba ïadei bad ki kam ba lait kiba dei ban long.
U Momin u la ong ba ka lah ban don ka jingpyrshang ban ïaid lait ïa ka Reservation Policy lyngba ki hukum kiba la buh tarik shadien ne ka jingpynmih ïa ki jingpynbna na ka bynta kawei ka kam ha ki por bapher bapher. Kum kine ki jingleh, lada la shah kin sa shah jop ïa ka nongrim jong ka jinglong khuid, ka jingïaid beit bad ka lad kaba ïa biang lang ha kaba ïadei bad ka jingthungkam paidbah.
U la kyntu ïa ki bor ba dei peit ban pynthikna ba kano kano ka jingpynbna ne ka jingthungkam hapoh ki skul deficit higher secondary dei ban bud pyrkhing ïa ka State Reservation Policy.