Ki kam MSME ki long kiba kongsan na ka bynta ka roi ka par

0

New Delhi, Rymphang 01: Ki kam MSME ki long kiba kongsan na ka bynta ka roi ka par jong ka India la ong ka Economic Survey 2024-25 ba la wanrah ha Parliament da ka Myntri Sorkar Pdeng ba dei khmih ïa ka tnad Kam Pla Tyngka bad Kam Kompeni, Nirmala Sitharaman mynta ka sngi. Ka Economic Survey ka ong ba ka Sorkar ka dang pyntreikam ïa ka Micro and Small Enterprises-Cluster Development Programme (MSE-CDP) ban kyntiew ïa ki cluster ha kylleng ka ri. Hapoh kane, ki Common Facility Centre (CFC) ki dei ki lad ban pynbeit ïa ki jingeh kum ka jingkyntiew ïa ka teknoloji, ki sap bad ka jingbha na ka bynta ki MSME.
Ka Survey ka pyni ruh ïa ka jingkongsan jong ka jingpynbiang pisa ïa ki MSME. Ka Sorkar ka la sdang ïa ka Self-Reliant India (SRI) Fund ïa kaba la pynbiang T 50,000 klur. Ka Survey ka ong ba ka fund ka don ka jingpynbiang kaba T 10,000 klur na ka Sorkar bad T 40,000 klur na ki equity/venture capital fund shimet.
Ka Economic Survey 2024-25 ka ong ba ka Sorkar ka ïeng skhem ban pynbeit ïa ki jingeh jong ki MSME lyngba ki sienjam kum ka MSME Samadhan bad ka rynsan CHAMPIONS (Creation and Harmonious Application of Modern Processes for Increasing the Output and National Strength). Ka Economic Survey ka ong ba naduh ka sngi ba la sdang ïa ka rynsan MSME SAMADHAAN 2,20,704 tylli ki application ki dei kiba la ai da ki MSME bad na kine 20652 tylli ki dei kiba la pyndep, 53493 tylli ki dei kiba dang hap peit da ka MSEFC, 60714 tylli ki dei kiba la kyntait, 45952 tylli ki case ki dei kiba la pyndep bad 39893 tylli ki case ki dei kiba dang peit. Haduh mynta ka rynsan CHAMPIONS ka ai jingtip ha khatwei tylli ki jait ktien.
Katkum ka Economic Survey 2024-25, haduh ka 26 tarik u Naiwieng, 2024, ki MSME ki la ai jingtip shaphang ka jingai kam ïa 23.24 klur ngut ki briew. Khnang ban pynsuk ïa ka jingkyntiew kyrteng jong ki MSME bad pynsuk ban trei ha ki kam khaïi pateng, ka Survey ka ong ba ka Sorkar ka la sdang ïa ka rynsan Udyam Registration ha u Naitung 2020. Kane ka rynsan online ban ai jingtip dalade ka donkam ïa ka PAN card ban kyntiew kyrteng. Ban pynskhem ïa ki Informal Micro Enterprises (IME), ka Sorkar ha ka jingïatreilang bad ka SIDBI, ïa ka rynsan Udyam Assist Platform (UAP) ha u Kyllalyngkot 2023, la ong ka survey.
Ha kaba ïadei bad ka jingplie lad ïa ki MSME ba kin ïoh shim ram, ka Survey ka kren shaphang ka jingpynkylla ïa ka Credit Guarantee Scheme for Micro and Small Enterprises (CGTMSE) kaba la leh lyngba ka jingpynbiang T 9,000 klur ïa ka Credit Guarantee Fund Trust na ka bynta ki MSME. Kane ka thmu ban plié lad ïa ki MSME ba kin shim ram shuh shuh haduh T 2 lak klur ha ka sut kaba la pynduna.
Ka jingsdang ïa ka TReDS ka dei ka sienjam kaba kongsan ba la shim da ka Sorkar India ban ai jingmyntoi ïa ki MSME bad ïarap ïa ki ban pynurlong ïa ki thong jong ki ha ka por kaba biang ha ka jinglut jingsep kaba kham duna, la ong u Survey. Ka TReDS ka dei ka ïew kaba plié lad ïa ki nongthied kum ki tnad Sorkar, ki Public Sector Undertaking, ki kompeni bad kiwei kiwei ba kin ai jingsiew ïa ki MSME ba pynbiang mar katkum ka MSMED Act 2006.

Leave A Reply

Your email address will not be published.