Ki kam jngohkai pyrthei ki shah ktah lang lada thut ki kali kamai

Shillong, Nailur 21 : Ki nongïalam shnong na ki thain Shnongpdeng, Dawki bad Darang kiba don ha West Jaintia Hills ki la dawa naka Sorkar Jylla ban shimkhia ïa ki mat jingdawa jong ki kynhun bapher bapher kiba don bynta ban kyntiew ïa ka kam jngohkai pyrthei hapoh Meghalaya.
Kane ka jingdawa ka la mih hadien ba ka synjuk ki kali kamai tourist ki la ïakhih kaba la poi haduh u pud ba ka la don ka jingsangeh wat ka jingkit ïa ki nongjngohkai pyrthei sha kylleng ki jaka jngohkai kiba don ha ka jylla.
Halor kane ka bynta na ka liang u General Secretary ka Dorbar Shnong Shnongpdeng u Bah Dapbor Syngkrem u la ong ba hadien ka Sohra, ka thain West Jaintia Hills kadei kawei ka thain kaba khring bha ïa ki nongwan shangkai pyrthei hapoh ka Jylla Meghalaya bad kumta bun ki shnong ha katei ka thain ki imja na ka jingwan ki nongjngohkai.
Katkum ka jingïathuh jong u, ka jingjia ba dang shen kaba mih na ka jingkhih ki tourist kamai ka la ktah haduh katta katta ïa ka jingwan ki nongjngohkai pyrthei sha ka thain bad ha ka jylla hi baroh kawei.
Halor kane ka phang, u ong ba ki kyntu jur ïa ka sorkar ba kan shimkhia ïa baroh ki jingeh ki ba mih naduh ki jingdawa jong ki synjuk kali tourist, ban pynbha ïa ki surok bad kiwei kiwei kiba kam haba ïadei bad ka jingkyntiew ïa ka kam jngohkai pyrthei hapoh ka jylla, ong u Bah Dapbor.
Shuh shuh u ong ruh ba ka jingsniew ki surok kadei kawei ka daw bah ba duna ki nongwanshang pyrthei ban hiar shaka thain West Jaintia Hills. “Ngi dawa naka Sorkar ban pynbha ïa ki surok ba pynïasoh ia ki jaka jngohkai pyrthei hapoh ka thain,” u la ong.