Ki kali ki nang mih thymmai manla ka sngi ki surok pat ki sah katjuh ba sa jur ka dheng kali: DGP

Shillong, Nailur 23: U Director General of Police U Dr LR Bishnoi ha ka sngi Thohdieng u la ong ba ba ka jingjur ka dheng kali ha ka nongbah Shillong ka dei na ka jingbun palat ki kali katba ka surok pat ka neh katjuh khlem nangheh satia. Haba kren sha ki lad pathai khubor u DGP u la ong ba ka jingmih ki kali thymmai ha ka nongbah ka long beit man ka sngi katba ki surok pat ki neh katjuh bad kumjuh ruh ka jingdon ki jaka pynieng kali kim nangmih thymmai satia na bynta ban ïaid bad pynïeng kali. U la ong ruh ba na ka liang ka tnat pulit pynïaid kali ka pyrshang dohïap dohim ban teh lakam ïa ka jingdheng kali namar kane ka buh jingeh lut ia baroh khoit.
Haba bynrap lang ïa kane u SP(City) u Bah Vivek Syiem u la ong ka jingdheng kali na ka daw ka jingrit surok ka dei ka daw ba kongsan nangta ka jingdheng kali ka nangjur shuh shuh haba don ki nongïiah kali kiba kwah ban tam duh beit shakhmat da kaba overtake lut ia kiwei pat ki kali kiba ïaid.
U la ong ruh ba ka jingdheng kali ha Shillong ka don da ki kynta ba jur bad ba ka duna “ka jingduna bad ka jingdheng kali ka dei beit na ka daw ba ki kali ki mih surok lang ha kajuh ka por bad dei tang ha kine ki kynta ba ka jingdheng kali ka jur.”
“Ka jingdheng kali kaba jur ka sdang na ka jingïeng ne sahngeh ba tang khyndiat minit eh jong ka kali kaba ïaid na khamat eh bad kane ka wanrah syndon ia ka jingsahkut sbak(lock jam) ïa ki kali kiba bud nadien bad ka jingdheng kali ruh ka neh da ki bun bun kynta.
Haba ïadei bad ka jingkynnoh ba ka jingïeng ki Bus saw bad ki kali kamai ban ap ïa ki Passenger ha ki bynta ka 9 Lad bad Motphran u Vivek u la kubur ba kane ka lah ban dei shibynta kaba pynlong ïa ka dheng kali ha kaba u la ong ruh ba na ka liang ka jong u ryngkat u SP traffic kin sa leit ban jurip ïa kane ka bynta khnang ban pyrshang ban tehlakam ïa ka dheng kali da katto katne bynta.
“Lada dei ba ka dei shisha kumba don ka jingkam na ka liang jong ka tnat pyniaid kali kan sa buh da ki kyndon ïa kine ki bus bad kumjuh ki kali kamai ba kim dei ban ïeng slem hynrei ban shu pynhiar bad kyntiew beit ïa ki nongleit nongwan ym ban ïeng sah hajuh ban ap briew “ u la ong.
“Na ka liang ka tnat pulit ka pyrshang ïa kaba bha tam, lada phi peit wat ka surok na Mawiong sha ki thaiñ Upper Shillong kaba ha ki por janmiet ka jingdheng kali ka jur bha hynrei da ka jingteh lakam ïa ki kali ban ïeng ha ki jaka ba khim bad ban tehlakam ïa ka jingpyrshang tam sha khmat ka la lah ban ïarap da kibun bun shah” u la bynrap.
U la ong ruh ba ka na ka liang ka tnat ka dang donkam shuh shuh ki pulit ban pynïaid kali ha kaba ka jingdon jong ki ka dang duna bad u la ong ba na ka liang ka tnat kan sa phah ka jingtyrwa sha ka tnat tnat Home Guard ba kan ai shuh ki pulit jong ka ban ïarap ha kaban pynïaid kali.