Ki jingsniew ba bun jait ki mih na ka jingsynjor ki longïing longsem: Hima Nongstoiñ

Nongstoiñ, Nailur 22: Ka synjuk jong ki nongshong dukan ha ïew Nongstoiñ kaba la tip kum ka Seng Ki Mahajon Ïew Nongstoiñ, kaba la thaw naduh u snem 2007 ka dei ka seng kaba peit ïa ka jinglong jingman hapoh ïew Nongstoiñ kata naduh ka jingkhuid jingsuba, ka shongsuk shongsaiñ, ka jingbit jingbiang jong ki para nongshong dukan baroh ba kynthup naduh ki dukan kiba heh, ba rit haduh ki dukan ba shong die madan.
Ha kine ki snem baroh ki nongïalam bad ki dkhot jong katei ka seng ki la trei shitom met bad mynsiem ban wanrah ïa ka bha ka miat ha baroh ki nongshong dukan bad ka la ïakhun tyngeh ban rat dyngkhong ïa ki kam sniew kum ki kam tuh kam thiem, ki kam die kyiad beaiñ, ki nongkhaïi droks bad kiwei kiwei hynrei kam pat don pat ïa kia ophis treikam kaba paka na ka bynta ban shong ïa ki Komiti ba kyrpang bad ki jingïalang ban ïapyrkhat ïa kiba bun ki kam ba ki dei ban trei.
Kumta da ka jingsngewkhia ki nongïalam ka seng ki la leit ban ïakynduh ïa u Syiem ka hima Nongstoiñ man la ka por ban kyrpad ïa u ba un ai jaka na ka bynta ba kin pynlong ophis. Kumta ha u snem ba la dep u Syiem ka hima Nongstoiñ u la sngew dei ïa ka jingkyrpad jong ki nongïalam ka seng u la ai jaka ïa katei ka seng ki mahajon ba kan pynlong ophis treikam ha ka ïing jong u kaba don hapdeng jong ka ïew Nongstoiñ.
Hynrei namar ba katei ka ïing kam pat biang satia u la aiti ha ka seng ki mahajon ba kin pynbha bad maramot hi bad ba kin pynbiang hi ïa baroh ki jingdon kam. Kumta ka seng ki mahajon da ka jingsngew kmen ki la maramot bad pynbiang hi nadiong shadong ha kaba la ïoh ban plie noh ïa katei ka ophis ha kane ka lah sngi u Blei ka 22 tarik Nailur.
Shuwa ban plie ïa katei ka ophis treikam jong ka Seng Ki Mahajon Ïew Nongstoiñ, la pynlong ïa ka jingpynkhuid ïa ka ïew naduh dang step ha kaba baroh ki nongshong dukan ki la ïamih ban pynkhuid ïa ki rud ki kiar bad ki jaboh jabaiñ ha la ki jong ki jong ki dukan hynrei ïa kito ki dukan ki bym don ba shong bad ki bym don ki trai ki la iehnoh kumto.
Hadien ba la dep ban pynkhuid ïa ka ïew la pynlong jingïalang ha khmat jong katei ka ophis ba la pynïaid da u bah Dmikstar Lyngdoh Nonglynkien u ba dei ruh u president jong ka seng, u bah Baristar Syiem uwei na ki nongtrei ha ka ophis u Syiem ka hima Nongstoiñ u ba la phah da u Pa Syiem Phyllasingh Syiem ban wan mihkhmat kum u kongsan ban plie ruh ïa katei ka ophis treikam, nangta u bah K.Mawlong 2nd Officer Incharge ka Nongstoiñ Police station, ki nongïalam ka VDP Committee Nongstoiñ Area bad kiwei kiwei.
Hadien ba la plie, la ïoh ïa ka jingpynshai na u bah PW Myrthong Secretary ka seng halor ka jingtreikam jong ka seng bad ki jinglut jingsep ha kaba pynbha bad maramot ïa katei ka ïing ban pynlong ophis treikam.
Ha kajuh ka por la ïoh ïa ka jingkren na u bah K.Mawlong 2nd Officer Incharge kum u symbud kongsan, u ba la ong ba ki pulit ki la pyrshang katba lah ba trei shitom bad ka donkam ïa ka jingïatrei lang na ka bynta ban rat dyngkhong ïa ki kam sniew, namar lada ki nongshong dukan ha ïew bad ki paitbah nongshong shnong kim ai ka jingïatreilang tang ki pulit kin ym lah.
U bah Mawkordor Kharsyemlieh president ka VDPCNA, u la ong ba naduh ba la thaw ïa katei ka kynhun kaba ki VDP jong baroh ki shnong kiba don sawdong jong ka sor Nongstoiñ, ki kam sniew hapoh ïew ki la duna hynrei ym pat lah satia ban rat dyngkhong bad pynduh jait ïa ki.
U la kyntu ruh ïa ki nongshong dukan ha ïew ba lada ki lap ba ki dukan ki shah pynpait bad shah tuh ïa ki tiar ki tar, ki dei ban pyntip wut wut sha ki nongïalam ka seng bad sha ki nongïalam ka VDPCNA, khnang ba kin leh ïa kaba donkam.
U bah Baristar Syiem haba kren kum u kongsan, u la ong ba ki bun kiba kynnoh ba ki jingsniew ba bun jait ki mih namar ka jingsynjor jong ki bor sorkar, ki bor synshar shnong bad ki bor pulit. Hynrei, lada wad bniah bad peit thuh bha, ym lah ban len ba ka jingjyllei ki kam sniew ka mih namar ka jingsynjor ka sdang na ki longïing longsem.
U la ong ruh ba lada ki kmie ki kpa bad ki long ïing longsem ki khlaiñ ban synshar bad hikai ïa ki khun naduh dang rit, ki jingsniew kim jyllei kumba jyllei ha kine ki sngi.
Ha kaba ïadei bad ka jingtrei kam jong ka Seng ki mahajon, u la ong ba ka jingïoh ban plie ïa katei ka ophis treikam ka la long ka jingkyrkhu kaba khraw ïa ka seng bad na katei ka ophis kin sa lah ban trei kham bha shuh shuh ïa baroh ki kam ba ki dei ban trei.