Ki jingshah leh beiñ ki khynnah kynthei ka dang don ha imlang sahlang: Justice Thangkhiew
Shillong, Nailur 12: Ka jingïasyllok hapdeng ki nongshong shnong ha kaba ïadei bad ki lad ai jingïada ïa ki khynnah kynthei kaba lam ban pynlong ïa ka sawdong sawkun kaba bha ha India bad kiwei kiwei, la pynlong ha Auditorium ka High Court of Meghalaya. Kane ka prokram la pynlong lang da ka Juvenile Justice Committee jong ka High Court ka Meghalaya bad ka tnat Social Welfare, ka sorkar jylla, ka MSCPCR bad kiwei.
U Hon’ble Mr. Justice Hamarsan Singh Thangkhiew, Acting Chief Justice ka High Court Meghalaya bad Chairperson ka Juvenile Justice Committee, u la long kum u kongsan. La donlang u Hon’ble Mr. Justice W. Diengdoh, Hon’ble Mr. Justice Biswadeep Bhattacharjee, Chairperson ka Meghalaya State Commission for Protection of Child Rights (MSCPCR) ka Agatha Sangma, Commissioner & Secretary jong ka Social Welfare u Pravin Bakshi, IAS, Director ka Social Welfare ka kong Camelia Doreen Langwa, MCS, Deputy Commissioner, ki heh pulit, ki nonghikai, ki principal bad kiwei kiwei.
Ha ka jingkren, u Justice Thangkhiew u la banjur halor ka bynta ki khynnah kynthei ban pynwandur ïa ka lawei ka imlang sahlang, bad khot ïa ki, ki budlum ka ri. U la ong ba lada pynkupbor bad ïada ïa ki khynnah kynthei, ym tang ba ka pynbha ïa ki jingim jong ki bad kumjuh ruh ban tei ïa ka jingim ba koit ba khiah bad ka imlang kaba khlaiñ.
Haba pynpaw ba ka jylla kadei kaba burom ïa ki longkmie, u la kdew ba ki jingshah leh beiñ bad jingshah ban beiñ ka dang don ha ka imlang sahlang.
U Justice Thangkhiew u la ring ruh ïa kajuh ka jingpynleit jingmut sha ki jingeh ba mad da ki khynnah kynthei haba ïadei bad ka koit ka khiah, ka pule puthi bad ka ïoh ka kot.
Haba kren ha kane ka jingïalang ka Chairperson ka MSCPCR ka Agatha Sangma ka la pynpaw ka jingdonkam ban wanrah ki jingïatreilang na ki longïing, ki shnong, ki skul, bad ka imlang sahlang ban thaw ïa ka sawdong sawkun ba ki khynnah kynthei kin kiew.
Kane ka jingïasyllok ka la ai ka rynsan ban ïakren hapdeng ki riewshemphang ban phai khmat ïa ki rukom treikam kiba don, ban ithuh ïa ki jingeh, bad ki jingtyrwa ïa ki lad jingïada kiba long kyrpang ïa ki khynnah kynthei ha Meghalaya bad ha kylleng ka ri.