Ki jingpyntip na ka ophis DC-EJHD ha kaba ïadei bad ka jingjia bthei bom dynamite ha par dewiong ha Mynsngat EJHD

Khliehriat Rymphang 8: U Kyrwoh khubor ba la phah na ka ophis u Deputy Commissioner ka East Jaiñtia Hills District ka pyntip ba ki shipai pyllait im ne ki Rescue Team ba kynthup ka NDRF, SDRF, Special Rescue Team (SRT), ki pulit, ki majistor bad ki heh sorkar ki dang don ha ka par dewïong ha Mynsngat ban trei ïa ka kam ban wad shuh shuh ioh dang don ki briew kiba dang sahkut ha krem dewïong bad ha ka jingwad kaba mynta ka sngi ym shem la lap satia ïa ki briew kumta ka jingioh ban sei ïa ki met ka dang long hi 27 tylli kat haduh mynta ka sngi ka 8 tarik u rymphang 2026.
Ki kynhun kiba don ha ka par dewïong ki la wad bniah bad ym shem la lap shuh ïa ki briew bad ïa ka jingwad yn nang bteng biang sa lashai ka sngi.
Shuh shuh ki bor district ka East Jaiñtia Hills District ki la long peitngor bha bad buh ïa ki bor ba dei peit ba kin khmih bha ioh dang don kiba tih dewïong beaiñ bad la buh san tylli ki kynhun pahara ba kynthup ruh ki majistor, ki pulit bad ki heh sorkar kiba na ka tnat Directorate of Mineral Resources (DMR)
La ong ruh ba ha ka jingiaid pahara ne drive la ioh ban kurup haduh kumba 38 MT (Approx) u dewïong beaiñ na ki ar tylli ki jaka kiba hap ha Lumnongthymme bad kumba 87 MT na kawei ka jaka na Lumbangla bad kumba 175.7 MT na ki ar tylli ki jaka kiba hap hapoh shnong Rangad, la kurup ruh ïa ki tiar ki tar bad kawei ka synduk ba la suba ba thep ïa ki tiar jingpynbthei ne ki gelatin sticks kiba don 204 tylli.
Ki kynhun ba iaid pahara ki la pynpra ruh ïa ki ïing ne ki camp ba la pyndonkam ha kaba tih dewïong beaiñ, halor kane ha kaba ïadei bad ka jingtih Dewïong beaiñ la buh ruh da ka ejahar bad ki bor ka aiñ ki dang leh ïa kaba donkam katkum ka aiñ.
U kyrwoh khubor u iathuh ruh ba kat haduh mynta la siew haduh T 24,00,000/ (Arphewsaw lak tyngka) kum ka bai lutksan sha ki ba ha ïing jong ki lanot kiba ngat ha ka apot jingbthei bom dynamite ha par dewïong beaiñ ha Mynsngat ha ka thaiñ Thangskoo bad ka jingai ïa ka bai lutksan sha kiba ha ïing jong ki lanot kan nang ïai bteng hadien ba ki la lah ban pynpoi ïa ki kot ki sla bad ki jingpynshisha.
Ki bor district lyngba u District Magistrate ka East Jaiñtia Hills District ki la pyntreikam ruh ïa ki kyndon jingmana kiba katkum ki kyndon aiñ Section 163 BNSS ban pyntikna ïa ka shongshngaiñ katba ka jingwad ïa ki briew ne ka operation ka dang iaid.